《我老婆唔係我女朋友》【那些年／九十年代學界／真人】 第七章全新中篇！: 【第七章】 出租男伴「游」（３）
可是考救生員，聞說水試好難喎？哈哈，對一般人來說可能好難、好辛苦，但對於日日泡在泳池被人大刑伺候的我們，所謂的水試簡直是笑話，係笑～隱～死～人嘅笑話！比跟老坑賭汽水還輕鬆，我們做直手拖和橫胸拖救法的考試時，甚至互相恥笑和鬥游得快，你估要游多遠呢？50公尺咋（一個直池）！濕碎得離譜，你想想，我比賽游50自（當然考拯溺唔是用自由式啦，用側泳鉸剪腳和背蛙），廿來秒就玩完，隨時痾篤尿時間仲耐啲，真係平日游Warm up或Cool down都多十倍八倍。不過認真的，我上拯溺課時，看見嗰啲潺仔真係游到死吓死吓，我思疑佢將來點可能救人。
讀中三那年，我已經跟泳會的友儕，柴娃娃的去上堂兼考牌，預備一俟18歲就可以開工，老媽聽到考完試有得開工，完全沒有反對，比之不准我去比賽時簡直是兩個樣。
那些年14歲已經可以去考拯溺牌，當時甚麼銅章、磁章，在沙灘考的銅十字章、銀十字章、急救證書等，統統都在兩個暑假內全部KO，後來老媽見成日要攞錢考試（考銅章200大洋、磁章250大洋，證書又要另費，還有上堂學費呢），出聲干預才沒有繼續去考Distinction，反正做暑期工都超晒班，綽綽有餘了（那些公家泳池的老屎窟，一般都是一個銅章走天涯）。
噢還有，千祈唔好畀《Baywatch》啲濕狗影集誤導了，那些年是「幾乎」沒有女救生員的，我當你有啦，都唔會有彭姑或地震妹噉嘅Cup數，FF都慳返，如果唔係人人都遇溺啦，泳池沙灘日日迫滿「窺佬、痴漢」，你諗吓佢喺後面擒攬住你，兩個漢堡包喺後面頂吓頂吓～嗚呀～仆街我日日喺泳池舉手叫救命呀，你夠我喺泳池「遇溺」的機會多咩。