【校園／愛情】戀上鄰家女孩（布甸篇）: 99. 團聚於平行時空
跟住下一秒子瑜已經衝咗落台，不顧一切咁向住禮堂正門方向跑，仲要跑得好快，我跟住佢後面，一前一後穿過觀眾席漆黑一團嘅環境，觀眾席一片嘩然，子瑜推開禮堂大門之後。
就見到有個女仔準備跑落樓梯，係曉琳。
「曉琳！！」
子瑜衝埋去拖住佢隻手仔，唔俾佢走。
「我唔准你走啊…」
眼見曉琳停低咗腳步，無嘗試掙扎開子瑜隻手，但亦都未有任何反應，只係任由子瑜拖住。我諗返起，初初我同佢拍拖，好快就知道到佢其實係一個好容易心軟嘅女仔，心底又好，又唔會隨便發脾氣…
「黃子瑜…」就係呢個時候，曉琳回身攬住子瑜喊，仲要一嚟就已經喊到塊面都紅晒，我差啲唔記得，呢個傻妹好易喊，子瑜好似個家姐咁拎住包紙巾幫曉琳抹走啲眼淚。
曉琳對住子瑜喊咗一陣之後，亦都留意到我嘅存在，我哋相望咗一眼之後就好自然咁避開咗對方目光。
「嗚嗚…對唔住啊我唔應該阻住你哋兩個…」曉琳啲眼淚鼻涕已經撈埋一舊。
「傻豬嚟嘅，佢閒人一個嚟，我哋唔使理佢㗎，呢度剩係得我同你兩個～」子瑜回首向我淺淺一笑，即係叫我抵諗啲，咁我都知係我衰仔，先至會搞到佢哋兩姐妹咁慘。
「嗯嗯…唔理佢啊！」曉琳淚腺決堤咁，子瑜包紙巾都頂唔住，佢索性用衫袖輕輕力幫曉琳印光啲眼淚。
我諗…就俾佢哋兩姊妹獨處多一陣，感情應該就會慢慢變返好？
可惜呢個時候我感覺到一股殺氣喺我背後湧現，我回頭一望果然就係訓導主任…
搞錯，點解啲timing係要咁差，睇佢火遮眼個樣實係想捉我哋三個擅離禮堂，眼見子瑜嘅努力即將俾呢個不諳人情世故嘅訓導主任踐踏，我要諗個方法阻住佢至得…
正當此時，我班主任Miss Chan居然及時挺身而出，拉住訓導主任隻手勸佢返入禮堂唔好插手，Miss Chan臨走之前回頭一下凌厲嘅眼神睥住我，但我感受到嘅反而係一絲絲嘅暖意。
Miss Chan你放心啦，我哋大個仔大個女㗎啦，我哋之間嘅問題，我哋識得點樣處理㗎啦。
無耐，禮堂裡面傳來頒獎嘅聲音，陸陸續續由男仔個人賽嘅冠亞季軍開始，跟住就到女仔個人賽，不過呢啲獎與我哋無關。
曉琳啲眼淚依然一滴接一滴，子瑜耐心咁一下又一下幫佢印返乾淨，雖然曉琳已經無一開始咁喊到七彩，但佢仲未完全收返啲眼淚，反而我見到子瑜有兩滴眼淚掛咗喺眼眶邊。
當我仲諗緊好唔好遞張紙巾俾子瑜，曉琳就伸手幫子瑜抹走嗰兩滴眼淚，搞到子瑜都忍唔住喊埋一份，佢兩姊妹依家哭成淚人之餘又互相幫對方抹眼淚。
咁溫馨嘅場面，睇怕我都唔使點擔心…而組合獎都開始頒發，季軍亞軍都上埋台拎獎，到最後冠軍嘅時候…竟然係我同子瑜攞到…
「係你哋攞冠軍啊…你哋快啲返入去攞獎啦…」從曉琳嘅聲線我聽得出，佢對於我同子瑜仲有啲酸意…
「唔攞啦，我哋又唔係志在想贏先參賽嘅，呢個時候曉琳你先至係最重要…」
啱啊，我點點頭，我同子瑜嘅諗法都係一樣，攞唔攞獎真係唔重要，重要嘅係你哋兩個女仔可以破鏡重圓開開心心，點知曉琳跟住就扁扁嘴。
「你哋兩個真係好襯，有冠軍都唔拎，佢又係咁，子瑜你又係咁。」弊啦，曉琳扭計添…
「我同佢先至唔同，我係為咗我個好朋友，所以先唔稀罕啲咩冠軍唔冠軍。」好彩有子瑜氹返佢。
「咁…126621係咩意思？」然後曉琳傻更更咁問。
「咪係我同你嘅生日日期囉～」子瑜當正曉琳係小朋友咁解釋。
「係啵。」
「傻瓜。」子瑜一邊幫曉琳抹眼淚，一邊幫佢梳返好啲頭髮。
禮堂裡面個主持連聲呼叫咗我同子瑜幾次無果，就放棄咗。
「曉琳，其實短頭髮都幾襯你吖…不過仲有啊，我話你知啊！無論點都好，我係永遠都唔會放棄你呢個好朋友㗎，我一定會陰魂不散咁纏住你一世㗎！！」硬係覺得呢啲咁好聽嘅說話係子瑜一早諗定…唔知佢今次係睇邊本書學返嚟呢…？
子瑜講完就對住曉琳叉住條腰，嘟起個嘴，兩邊腮又脹起咗，呢個姿勢十足十平時對住我發脾氣咁，最搞笑嘅係，曉琳竟然伸對手埋去篤子瑜個金魚腮，然後仲捏佢塊面珠墩…乜呢招唔係我用開㗎咩！？
最後兩姊妹又再攬埋一齊。
咁咪好啦，見到佢兩姊妹終於和好如初，咬住耳仔講埋晒啲唔知咩，講完就喺度陰陰嘴笑，不過禮堂裡面個頒獎環節好似都完咗，我聽到啲同學差唔多準備出嚟。
「我哋行囉～」子瑜拖住曉琳隻手向住樓梯方向行，無視咗我存在。
「喂喂…你哋去邊啊？」我弱弱的問。
「唔關你事～」搞錯黃子瑜你個衰妹，陪完你追返曉琳之後轉個頭就打完齋唔要和尚。
「係囉，唔關你事～」吖，曉琳你又有樣學樣喎。
誰不知曉琳走埋嚟我度，扁扁嘴望住我，但眼神又帶有三分委屈，跟住起腳一嘢踢落我度…
嘩！痛！
踢人呢家野只有子瑜呢個衰妹先會做，我又點估到一向溫柔體貼嘅曉琳會學埋子瑜啲衰嘢，即使我受過三年嘅教訓，對於曉琳呢下突襲，依然係猝不及防，連企喺旁邊嘅子瑜應該都始料未及…
「原來係咁嘅滋味，唔怪之得子瑜你咁鍾意踢佢…」
曉琳踢完我之後，就返埋去子瑜度翹住佢隻手，曉琳依家個眼神，好似釋放咗抑壓已久嘅唔開心，亦都好似係幫完好姊妹出返口氣咁，然後眨眼間子瑜已經意會到曉琳呢腳背後嘅意味…
聰明如我又點會估唔到跟住落嚟會發生乜事，不過當我想轉身走都太遲，黃子瑜已經衝到埋嚟…
「嘻嘻…」個衰女包嘅笑意，完全係不懷好意！！
嗚啊啊！我俾兩個女仔校園欺凌啊！！