【校園／愛情】戀上鄰家女孩（布甸篇）: 97. 同班女孩的救贖
話說呢日我同子瑜約好咗晨早流流七點幾就返學校佈置我哋間課室。欸…雖然嚴格嚟講只係我間課室，咁我哋早幾日去咗一間連鎖式傢俬鋪，用學生都負擔得起嘅價錢買咗好多聖誕裝飾，連棵聖誕樹都抬埋返嚟，就係想趁聖誕聯歡會班同學仔唔會咁早起身返學，偷偷地佈置好個場地，搞下氣氛俾個驚喜佢哋。
由朝早到依家，我就不停地擒高擒低將啲聖誕裝飾掛上去，而子瑜就默默一件接一件咁遞俾我，我諗返起以前同佢一齊整壁報板嗰陣，總係當我係阿四咁，點我做呢樣做嗰樣，但依家嘅子瑜好似多咗份賢良淑德。
「喂，陳佑男你快啲拎住啦，我遞到手都軟喇…」
「知道喇…」稍一分神就俾子瑜話喇…
「我都話你唔使咁早起身嚟幫我㗎啦，你一陣間晏晝仲有要事在身，瞓耐啲唔好咩？」
「你依家好唔想見到我咩…」
以前總係覺得呢個傻妹古靈精怪，同佢嘻嘻哈哈嘅時候特別開心，但呢個學期經歷過咁多事之後，我見證過呢個女仔唔開心嘅時候，亦見過佢感性嘅一面，有把聲音不斷提醒住我一定要好好咁保護佢。
「喂喂，仲有一件未掛完啊，你落嚟做咩？」見佢嘟起嘴個樣咁可愛，我就有股衝動想…
「黃子瑜你唔好郁啦。」我哄埋去想搣下佢塊面珠墩…
「唔准～唔准掂我。」子瑜塊面開始紅卜卜。
「點解喎？」我再哄埋啲…
「因為…呢度係學校，有好多老師…同埋同學望住你蝦我…」講大話嘅你，明明晨咁早成層就得我同你兩個…人影都唔多個。
「搣一下都唔得咩…？」我再問，然後加多個可憐樣，動之以情令佢心軟…
子瑜個傻妹眼碌碌咁望住我，諗咗一陣…
「咁…一下好啦。」
「嗯。」
我咁百厭，梗係會好聽子瑜話，話明係搣一下，我就雙手搣住子瑜兩邊面珠墩，然後趁佢反應唔切，哄埋去出奇不意咁輕輕惜咗佢嘴仔一啖…
啜～～
黃子瑜俾我偷吻成功之後，即刻瞪大隻眼望住我，識咗佢咁多年嘅我，當然好清楚知道佢下一步想點…
「饒命啊黃子瑜，唔好踢…」我即刻退後一步，擺返個防禦姿勢，係弱弱的破綻百出嗰隻。
子瑜乘勢踏前一步，佢想起腳踢我但又停低咗，想嬲我但偏偏個樣又好可愛。
「喂吔陳佑男！我唔理啊，你要俾我踢返一腳。」平時子瑜你係毫無預兆之下突襲我，幾時變到咁識撒嬌扭計。
「好好好…但要細力啲…」
嘩！！痛！！
嗯，我同子瑜之間嘅情愫，喺一場暴力慘案之中，默默地萌芽成長…
其實今日都算幾凍，我哋兩個晨早流流返學校仲佈置到課室咁有聖誕色彩，都真係要俾啲掌聲我哋，望下課室個鐘都差唔多八點半，聽到外面啲嘈吵聲都知道啲同學開始返緊嚟。
「唔睬你啊，我返去先喇，我仲想趁有少少時間記熟啲歌詞。」子瑜執埋啲嘢返咗去自己班房。
我無聊無事幹，就坐咗喺角落頭望多次轉頭聖誕party個rundown有無甩漏，班同學仔喧鬧聲亦都漸漸傳到入嚟課室。
「嘩！咁正嘅，仲要有棵聖誕樹喺度。」某某女同學同埋幾個女仔一返到嚟就對住啲佈置讚嘆不絕。
「係咪你整㗎？」另一某某女同學走埋嚟問我，但平時同佢半句說話都唔多。
「欸…都係嘅。」我應承咗子瑜唔可以話俾其他人知佢有份幫手。
「OMG！不得了！係聖誕樹啊！！」短髮妹妹翹住圓框眼鏡妹妹隻手踏入課室門口。
我都唔明啲女仔做咩見到聖誕樹就雙眼發晒光，其實呢棵聖誕樹係出自於子瑜嘅主意，我哋只需要獻出一個午餐嘅價錢，就喺嗰間連鎖式傢俬舖執到返嚟。
陸陸續續啲同學都返得七七八八，家樂就依然係同佢最近玩開嗰幾個男仔一夥，然後芯玲同曉琳兩個孖公仔咁一齊返嚟，曉琳仲剪咗個短髮型…
最後Miss Chan入嚟點完人數，然後就向住我露出一個滿意嘅笑容，跟住就叫我哋自己玩得開心啲，佢話佢仲有好多簿未改唔得閒理我哋…
咁個聖誕party都算係順利嘅，成班同學一齊玩下遊戲抽下小禮物，有啲女仔拎起電話喺度拍vlog，有啲男仔玩到忘晒形，仲俾我留意到家樂同短髮妹妹多咗好多不尋常嘅眼神小交流…最後啲到會嚟到嘅時候，色香味俱全大家都食得津津有味，我首先要多謝Miss Chan私底下嘅慷慨贊助，其次都要感謝大家肯俾面幫手搞氣氛，呢個上晝先可以完滿結束。
只係曉琳全程坐咗喺課室角落悶悶不樂，比著係以前活潑開朗嘅曉琳肯定會成為全班焦點，但我見就算有男仔行埋去撩佢玩，佢都只係微笑婉拒，而我礙於要做MC主持大局，加上我嘅身份又有啲尷尬，我都顧及唔到咁多…好彩仲有芯玲坐佢隔籬陪住佢。
完咗之後，就準備一齊去禮堂聽sing con…進入今日聖誕聯歡會嘅另一場重頭戲，我同子瑜等咗成個禮拜終於嚟到呢個時刻，我寄望子瑜嘅計劃可以順順利利，亦都開始有啲戥子瑜緊張。
呢個時候，芯玲唔知喺邊度彈出嚟拍我膊頭。
「肯定係背後有高人指點你啦～」
「芯玲？」俾佢嚇咗一跳，定完驚我就即刻望下曉琳喺唔喺佢身邊。
好彩只係得佢一個。
「你同黃子瑜係咪已經喺埋咗一齊喇？」我發現芯玲呢個女仔除咗醒目之外，都幾八卦。
「未啊。」雖然今朝早我哋先...
「咁渣㗎，仲諗住睇好你今個聖誕節假期有禮物拆添。」
「吓？」拆禮物？有咩禮物拆？
都唔知道芯玲想講咩…不過佢都成個星期無主動同我講過嘢，但我始終唔敢問佢曉琳嘅事，望住班同學仔人潮洶湧咁步入禮堂準備聽歌，有啲仲帶埋自家製燈牌入去做小粉絲，而我就有要務在身，逼到入禮堂之後即刻趕過去後台。
後台已經坐滿晒一眾參賽嘅同學仔，有啲拎起部電話碎碎念咁記緊歌詞，有啲tune緊枝結他，我喺人群當中亦搵到我要搵嘅嗰個人，嗰個朝早俾我偷偷地惜咗一啖嘅女仔，都係其中一個參賽者...
而佢亦都見到我行緊埋佢度，點知一嚟就俾佢鬧…
「你咁遲先到㗎！！」