【校園／愛情】戀上鄰家女孩（布甸篇）: 84. 夢醒過後的晨曦

離開醫院嘅呢程小巴，我同子瑜兩個依舊揀咗最後嗰排坐，而佢就好似個小妹妹咁挨埋嚟我度，輕輕力咁翹住我隻手。

「陳佑男。」未試過聽過子瑜把聲咁溫柔。

「做咩？」而我都不知不覺間咁配合返子瑜嘅溫柔。

「無啊，純粹想講聲多謝你咋嘛。」

「傻瓜，之後有咩需要幫手嘅話都可以隨時搵我，探病、拎功課同接出院我統統都可以㗎～」





「點解你係要對我咁好…？」

做咩我要對子瑜咁好？可能係我辜負咗佢太多？定係我唔忍心見到子瑜掛住照顧身邊嘅人而忽略咗自己，定係單純因為我鍾意呢個女仔，總之我就好想繼續為子瑜佢做多啲嘢。

但良心話俾我知，其實我對子瑜一啲都唔好，如果係好嘅話，就唔使搞到個局面好似依家咁。

無論點都好，我同子瑜喺醫院探黃子俊嘅經過就去到呢度暫告一段落。

至於你問我，咁條玉桂狗鎖匙扣有無送到出去？邊有咁易吖，雖然唔知道黃子俊喺邊度學埋晒呢啲買小禮物追女仔嘅技倆，不過呢條玉桂狗鎖匙扣究竟應唔應該送出去，同埋點樣送又係另一個問題。





第二朝返學，我差啲唔知醒，因為電話唔喺身，床邊個鬧鐘㩒咗又無反應，好彩我呀媽拍醒我，跟住我就即刻衝入廁所沖涼刷牙洗面梳頭一氣呵成完成，笠埋套校服上身準備出門口。

踏出門口嘅一剎那，望住子瑜屋企道鐵閘，佢應該出咗門口，我諗返起過去兩日所發生過嘅事，就好似發咗一場夢咁，夢醒過後個世界已經變咗，原本個世界已經無得再返轉頭。

我諗我都未試過返學會咁緊張，唔知道今日返到課室見到曉琳可以講啲咩好，對住芯玲我仲可以點解釋，當住全班同學面前我仲有無面目做人…

一個人行吓行吓就返到學校，入課室之後我第一時間望吓曉琳返咗嚟未，但見佢個位空空如也，旁邊開始傳來鄙視嘅目光，有幾個女同學望住我喺度竊竊私語，我都唔敢四圍再望，即刻耷低頭行返埋自己個位坐底。

當我坐低之後，先發現原來芯玲已經坐咗喺度。





「仲以為你唔會再返嚟添。」芯玲眼尾都未睄過我，雖然我知道佢同緊我講嘢。

「對唔住啊…」

「唔使同我講我對唔住啊，你留返同曉琳講啦。」芯玲趁仲未打鐘拎咗份Chem功課出嚟慢慢做，依然無望過我一眼。

唉，我連有啲咩功課做都唔記得晒，係…我知道呢個係學生嘅本份，但呢幾日我仲邊有心情去處理呢啲瑣碎事。

我斜眼望過去短髮妹妹同家樂嗰邊，佢兩個都已經返咗嚟，不過就只係各自各坐完全零交流，家樂一副生無可戀嘅模樣，望到個心都唔好受，至於短髮妹妹雖然無家樂咁低氣壓，但係都唔好得去邊，只不過憂愁嘅表面背後係流露住一點點氣憤。

鏡頭一轉，圓框眼鏡妹妹揹住書包走入課室，佢一返嚟見到短髮妹妹唔開心就即刻上前安慰佢。

「吖，係啊，嗰日曉琳幫你執返你個背囊，你啲電話銀包統統都幫你保管好。」芯玲將份功課揭去第二頁繼續默默咁做。

「咁我一陣問…」我仲諗住呢個就係契機可以同曉琳溝通，點知芯玲打斷咗我。





「不過曉琳將你啲嘢交晒俾我，嗱你個背囊啊，你自己睇吓裡面啲嘢齊唔齊先喇。」芯玲唔知喺邊度變個背囊出嚟㨃俾我，但依家個重點唔係裡面啲嘢齊唔齊。

「咁點解…曉琳會託你將啲嘢交俾我嘅？」我眼角再望一望曉琳個位，其他同學都已經返得七七八八唯獨是曉琳仲未返到。

「我係你嘅話，我就會睇吓自己部電話先喇，我要講嘅嘢係咁多，你睇唔睇都係你嘅事，唔關我事。」芯玲講完之後就將份功課塞返落櫃桶，雖然我已經有心理準備芯玲對我嘅態度唔會再好似以前咁，但到親身感受嘅時候依然唔太好受，之不過我又可以怪邊個，一切都係我自己攞嚟嘅。

「電話…？」有啲咩睇？

正當我諗住伸隻手摷部電話出嚟望嗰陣，班主任Miss Chan對高踭鞋嘅腳步聲已經猶如死亡喪鐘咁敲響，嚇到我即刻將部電話塞返落背囊裡面。