【校園／愛情】戀上鄰家女孩（布甸篇）: 75. 再去吧！追尋你心中所愛！

陸運會嘅第二日朝早，我比其他同學仔差唔多早成粒鐘起身，出門口嘅時候，子瑜屋內依然未有動靜。呢個鐘數，個天先啱啱光晒，我諗佢兩姊弟應該仲瞓緊覺。

而我就急急腳趕緊去曉琳屋企樓下，你問我點解要咁早過去搵曉琳？我都唔知啊，總之我尋晚應承咗佢，會陪佢早啲返運動場幫手佈置。

曉琳本來話唔想我咁早起身，怕我唔夠瞓會影響今日比賽狀態，不過我就話咁我可以早啲瞓，早睡早起身體好吖嘛，果然今朝一起身精神飽滿，配合埋秋風送爽嘅天氣，希望能夠作為迎接全新一天嘅好開始。

「曉琳你睇，我買埋早餐可以一齊食。」曉琳一出嚟我就將袋麵包㨃喺佢面前，入面嗰兩隻雞尾包依然仲係暖暖哋。

「買埋早餐俾我咁好嘅。」





「梗係啦，唔可以餓親自己女朋友㗎嘛。」

沿路上，曉琳一邊捧住個雞尾包，另一邊拎住部手機憂心忡忡咁覆緊訊息，連嘴角黐住咗粒椰絲都無為意到，我用手指尖輕輕幫佢抹走。

「我哋啦啦隊有個妹妹今日發燒病咗啊，我哋臨時臨急搵唔到替補。」曉琳放返部手機落裙袋，伸手搭住我手臂。

「吓咁點算好？」我問。

「由我嚟頂上囉～佢哋話反正本身都係我負責排舞，所以就決定推咗我出嚟。」





「咁到時咪可以見到你跳舞？」

我開始幻想緊我隔離呢個女仔，著住條短到露咗半截大髀嘅百摺短裙，扎起孖辮拎住個彩球載歌熱舞嘅模樣。喂咪住先！人哋曉琳都無話今屆陸運會啦啦隊比賽係會著百摺短裙，咪咁快流晒口水先得㗎。

「係啊，係咪好期待呢？喂吔你做咩笑得咁奸嘅？」曉琳一嘢搣落我手臂度，但見佢天真爛漫嘅笑容，唔知道佢係咪已經原諒咗我呢？

不過無論點都好，我再一次返到嚟呢個運動場，由於未到八點半正式開始時間，看台上面只有零星同學喺度執拾同佈置緊，有啲就開緊早餐會議，幾乎全部都係學生會同社幹事會嘅同學，除咗我呢個例外。

無錯，我為咗要展現我嘅殷勤，今日我幾乎成為咗半個藍社社幹事，我成朝一直陪伴喺曉琳隔離幫佢做啲擔擔抬抬嘅工作，做熟咗仲開始識得幫啲同學仔處理借釘鞋嘅登記手續，之後仲同曉琳加埋其他社幹事一齊帶住看台班同學仔嗌cheers打氣。





原來曉琳做嘅嘢係咁辛苦，但又幾熱血，幾好玩，而且嗰種對自己個社嘅歸屬感會一下子湧現出嚟，覺得所有著住藍色運動服嘅同學，無論男女高矮肥瘦都係一個大家庭。

就係咁，我同曉琳兩個一齊過咗一個充實嘅朝早，又嚟到午飯時間，因為我成朝都混雜咗喺藍社社幹事個圈子裡面，所以Lunchtime時候亦都順理成章跟埋佢哋一齊喺看台上面食外賣，而芯玲三姊妹就話想趁機透透氣所以出去食。

藍社幹事會一共係四男兩女嘅組合，講真起初我都有啲擔心我呢個外人會格格不入，加上我細佢哋一屆，嚴格上嚟講我仲要係第一日識佢哋，雖然佢哋個個都嗌我佑男前、佑男後，但我仲未認得晒佢哋啲名。

再加上藍社社長呢個人一直係我芥蒂，但我發現佢都唔係我想像中咁受歡迎，反而曉琳先至係眾人寵兒，班師兄師姐當正佢係妹妹咁照顧。

「曉琳，點解你咁叻可以氹到你男朋友嚟幫你。」眼前呢位師姐細細粒，但戴住眼鏡有種成熟嘅氣質，亦都係最多口水嗰位。

「你都可以叫你條仔過嚟幫手㗎。」隔離呢位個師兄亦都係口水多過浪花。

「咪玩啦，我同佢都唔同社，分分鐘佢依家同緊啲師妹撐枱腳都唔出奇。」

曉琳靜靜雞喺我耳仔邊講，嗰位師姐嘅男朋友就係隔離綠社個社長，呢餐飯局如果無曉琳從旁解釋，我都未必聽得明佢哋傾緊啲咩，我以為佢哋會認真傾啲社務上嘅工作，但原來都係講吓無聊八卦嘢，氣氛輕輕鬆鬆。





「曉琳，一陣間晏晝俾你男朋友抖吓喇，唔好搞到人哋太攰，如果唔係就無力跑比賽㗎喇。」嗰位師姐向住曉琳講。

「知道～」曉琳笑瞇瞇回應。

師姐嘅一句說話又真係令到曉琳唔再俾我插手幫忙，連嗌cheers都叫我唔好咁落力驚我晒咗啲氣，結果我食完呢餐晏飯之後，就變成遊手好閒陪住曉琳做社務。

我喺看台上面扶住條玻璃欄杆，一路望住場上比賽班師弟同師妹有人歡喜自然有人愁，而場邊看台嘅情緒亦都越嚟越高漲，特別係應屆畢業嗰班個個已經換晒自己嘅班衫，享受緊中學生涯陸運會嘅最後時光。

隨住各項個人賽事結束，剩返落嚟嘅就係社際團體項目，低組別嘅男女子接力比賽陸續開始，而社際男子甲組四乘一百米接力亦都進入第二次召集。

其實當聽到司令台宣佈第一次召集嗰陣，我個心已經開始越嚟越緊張，畢竟呢場比賽我係因為曉琳先有機會上陣，曉琳雖然從來無表示過佢嘅期望，但我都唔想令到佢失望。

而到第二次召集嘅時候，正當我揸住對釘鞋，四圍張望大師兄同二師兄嘅位置，忽然間有人輕輕掹一掹我衫袖，然後捉住我隻手帶咗我去看台底個雜物房。





「傻瓜，做咩捉咗我嚟呢度啊？啱先已經宣佈咗第二次召集喇，一陣間遲到俾人取消資格就大件事。」我見四下無人，直接拖住曉琳對手。

「你唔好郁吖，我要幫你畫上去。」曉琳唔知邊度變咗支藍色顏料出嚟。

然後曉琳將啲顏料細細力咁擳咗落手指尖度，跟住哄埋嚟全神貫注咁喺我塊面度畫嚟畫去。

「你畫咗啲咩喺我塊面度？」我同曉琳個距離近到可以聞到佢嘅陣陣體香。

「我幫你畫咗我哋藍社社幹事嘅專屬彩繪啊，你唔好郁啦差唔多畫好喇。」

跟住曉琳褪開咗半步，俾我睇清楚佢左邊面頰上面嘅嗰兩條藍色平行線彩繪。

「應承我，一陣比賽唔好俾咁大壓力自己啊知唔知道，無論贏定輸都好，你肯幫我跑我已經好開心。」曉琳聲線娓娓動聽。

「曉琳你放心啦，我應承你，我一定會幫你贏呢個冠軍返嚟，到時候我哋就可以反超前，拎全場總冠軍。」我拖住曉琳對手，許下我嘅諾言。





「嗯，咁你快啲去集合啦，到時我會喺終點位幫你打氣㗎～」

曉琳嘅笑容總係有種令人溶化嘅魔力，臨走之前，我忍唔住行前一步輕輕錫咗佢一啖，搞到我呢個女朋友瞬間紅粉緋緋，咬住嘴唇，依依不捨咁望住我離開。