【校園／愛情】戀上鄰家女孩（布甸篇）: 64. 命運漩渦的降臨

星期五嘅放學鐘聲響起之後，身邊啲同學紛紛提早執書包離開學校享受假期，短髮妹妹同圓框眼鏡妹妹已經不知所踪，原先我仲諗住趁課室無咩人就可以搵芯玲傾心事，但係我個如意算盤始終未能預期打響，因為曉琳走咗埋嚟我同芯玲前面個位度坐低。

「好眼瞓啊，我可唔可以唔咁早上去社房。」曉琳兩隻手伸前攤咗喺我張枱度，扁扁嘴咁望住我。

「捱埋今日就完㗎啦。」睇見曉琳呢個可憐模樣，我嘅憐憫之心油然而生，情不自禁捉住曉琳隻手安慰返佢。

「曉琳啊，我睇過本心理學書入面講到，當見到自己心愛嘅人會因為安心而更加容易覺得眼瞓㗎。」芯玲攝咗個頭埋嚟湊熱鬧。

「但係芯玲我依家望住你都覺得好眼瞓，咁會唔會係因為你都係我心愛嘅人，嘻嘻。」曉琳笑道。





「你依家先發現太遲喇。」芯玲道。

「點解啊？有心唔怕遲。」曉琳疑惑地問道。

「因為你個心已經俾陳佑男佔據咗，我哋註定無可能一齊喇，嗚嗚...」芯玲同曉琳兩個女仔你一句我一句，呢種情景我諗起子瑜同曉琳以前都會咁樣，女仔之間嘅友誼有時候就係會咁樣互相表達愛意。

「無啦，佢應承咗我嘅嘢都唔記得咗。」曉琳忽然之間提起我，我即刻豎起對耳仔聽。

「陳佑男佢應承咗你啲咩唔記得咁衰啊？曉琳你講嚟聽吓？」芯玲望向我陰陰嘴笑。





「早一個禮拜佢應承咗我會帶我上佢屋企玩㗎，但係我一直都無機會可以上去玩。」曉琳向住芯玲訴苦，聲線仲好委屈可憐。

「喂陳佑男！咁你就唔啱啦，人哋曉琳都開到口，你仲係一碌木咁無反應，你知唔知出面幾多男仔恨！都！恨！唔！到！？」最尾嗰幾隻字，芯玲仲要用手指篤住我。

呢一邊芯玲怒睥住我，嗰邊曉琳眼仔碌碌咁望住我，今次我就真係俾兩個女仔夾咗喺中間動彈不得，睇怕唔提出解決辦法都唔使旨意甩到身。

「曉琳，不如完咗陸運會之後再搵日好唔好？」其實下個禮拜一就係陸運會，但至少等我有啲時間思考一下點樣拆解會同子瑜撞見呢個問題。

點知曉琳聽完之後個表情仲係原封不動，依然係眼仔碌碌咁望住我。





「吓？咁無誠意嘅？」芯玲仲要喺旁邊煽風點火。

「咁…不如聽日禮拜六吖。」情急之下，我未經大腦就拋出咗一個提議。

「好耶～終於可以上去你屋企玩，芯玲都係你最叻，諗到呢招。」曉琳瞬間勁興奮捉住芯玲隻手，似足個終於成功扭到爸爸買玩具嘅小妹妹咁。

「其實係全靠曉琳你生得靚女又可愛，氹到陳佑男落搭就真。」芯玲笑道。

而我依家先意識到自己俾芯玲擺咗一道，兩個女仔喺我面前交咗場戲，我呢就胡裡胡塗咁應承咗曉琳聽日星期六帶佢上嚟我屋企玩，仲要我咩都未準備好，而且唔知準唔準備得切。

就係咁，原本睡眼惺忪嘅曉琳，聽到我應承佢之後又充滿活力回復返精神，開開心心咁同我揮手講拜拜離開課室上去社房，我望住曉琳嘅背影，啱啱佢嘅笑容，就同當日我請佢食朱古力布甸燒嗰陣個笑容一模一樣。

「嘻嘻...」芯玲喺我旁邊偷笑。

但我亦都諗返起，嗰日曉琳因為個布甸燒成個跌咗落地而淚流滿面，令我不自覺產生咗一種不祥預感。





「又話陪我傾正經事，原來你同曉琳一早夾埋嘅。」我側身望向芯玲。

「嘿嘿，咁女仔梗係幫返女仔㗎啦。」芯玲笑道。

事到如今，原本我仲想喺芯玲身上套取一啲關於子瑜嘅意見，睇怕依家都唔係一個好時機...

「喂好心你啊，對自己女朋友好啲啦，唔好成日要人哋心掛掛。」芯玲趁我思考緊嗰陣再補多一句。

芯玲最後嘅呢句令我霎時頓悟咗一個道理，原來一件事個女仔無再提，唔代表佢無再擺喺心，我以為呢個禮拜曉琳因為忙陸運會嘅事，已經唔記得咗上我屋企玩嘅呢回事，但其實佢一直等緊我嘅回應，而我就只係一直令佢失望。