【校園／愛情】戀上鄰家女孩（布甸篇）: 57. 花開花落終有時
「唔使驚喎，我又唔會走咗去嘅。」當下望住子瑜楚楚動人嘅表情，我有種就算佢想要咩我都會想盡辦法滿足佢嘅衝動。
「你可以唔返嚟㗎，反正我都無預你碗飯嘅。」子瑜講完就擰歪面。
你啊，明明前一句先驚我會走咗去，依家態度轉得咁快變到咁嘴硬，咁本身我都無諗住要返屋企換衫嘅，既然係咁我都急急腳返入屋企，求其喺衣櫃度摷咗套衫就笠上身，然後踢住拖鞋過返隔離屋，子瑜一直開住度門等我返嚟。
「我返嚟啦。」
「嘩，你做咩著到咁性感啊。」返嚟之後，子瑜嘅第一句居然係咁。
「有幾性感啊？咪一件背心加條波褲，平時落街跑步都係咁樣著。」
講到性感，點夠你赤腳周圍走，露晒啲嫩滑腳指出嚟咁性感，都未計你條短褲啊，長度只係啱啱好夠包住你個patpat，但係本身你又生得唔高喎，對腳短短地又幼幼地，都幾可愛。
不過我都未欣賞完子瑜嘅衣着打扮，就已經俾佢拉咗入廚房幫手，貫徹返我呢個做阿四嘅角色，擒高擒低呢啲工作不在話下，但係呢度地方淺窄，廚房呢個細小空間企兩個人已經無咩轉身餘地，我同子瑜經常要互相換位先可以保持到運作暢順，況且爐頭就得一個，切餸擺碗嘅平台仲細過課室張書枱，呢頭佢切好晒啲梅菜，嗰頭我已經要幫手掉個砧板落洗手盤，騰空返個地方用嚟撈勻啲免治豬肉，跟手又要轉身擒高喺廚櫃上面將個鑊拎落嚟放喺個爐頭度，呢下假如少啲默契就會將個鐵鑊直接鏗落子瑜個頭度。
不消一會，兩餸一飯已經準備妥當，家常便飯但係色香味俱全，今次黃子俊個豆釘聞到飯香就自動自覺走咗出嚟幫手set枱。
「好味。」
「好味就食多啲啦。」子瑜面露笑容挾咗條菜喺佢細佬碗飯上面。
「陳佑男我話你知啊，呢兩個禮拜啊，黃子瑜煮嗰啲餸淡茂茂無味㗎，今日終於有返味道。」
「喂！黃子俊食你就食啦，咁多嘢講。」
「嘻嘻。」呢個豆釘激完佢家姐之後，傻更更咁對住我笑，然後又大啖大啖咁爬啲飯入口。
佢食到嘴角都黐咗粒飯，得我呢個角度先至望到，於是我伸手幫佢抹走，但回頭一望見子瑜個飯碗又空空如也一粒飯都無。
「子瑜，我同你分一半啊。」我拎起自己嗰飯碗準備𢳂啲俾佢。
「喂吔唔使啦。」子瑜起初都有啲抗拒，後尾由得我繼續𢳂落佢個碗度。
「你食多啲啦，唔食飯唔夠營養㗎。」但見子瑜呆咗咁無晒反應，我再補多句。
「放心啦，我未開始食㗎，無我啲口水。」
跟住先見個傻妹嘟起個嘴，終於肯爬咗啖飯落口，咁咪好囉，我哋仲喺發育期當中，食多啲飯先會快高長大㗎嘛，知無？
呢個時候個天都黑晒，望出窗外，厚厚一層雨霧幾乎阻擋一切視線，見到嘅只有我、子瑜同佢細佬三個人圍埋一齊享受家常便飯嘅倒影。
食飽飽之後，我幫手執好啲碗碟拎入廚房，平時子瑜都唔會叫我幫手洗碗，但今日我好想幫佢分擔下家務，佢細佬都好乖㗎，幫我疊好啲筷子遞俾我，就轉身匿返入房。
「喂，你剩係抹個鑊面唔抹埋個鑊底㗎，你係咪因為唔係自己屋企嘅，求其洗就算㗎？」
子瑜喺我身後面攝咗個頭過嚟監督我洗成點。
「梗係無啦，我好認真洗㗎，你睇。」我即刻拎起支洗潔精，唧多兩下落塊百潔布度起勢咁捽。
「嘩！咁多泡，你想曬晒我啲洗潔精啊？」嗱，無話我話嘅，黃子瑜佢又開始嬲啦。
忽然間我心血來潮，喺個洗手盤度撩起一團泡泡，擰轉身黐落子瑜塊面珠墩上面，佢脹起咗嘅兩邊腮啱啱好可以晾住嗰團泡泡。
「嘻嘻。」見佢咁可愛，我真係忍唔住笑。
但下一秒鐘，我已經估到子瑜會有咩反應。
「啊！！」只係無諗過會咁痛，個衰妹一腳踢埋嚟我腳脛位置，我即刻伸手揞住個位，差啲以為俾佢踢斷咗條骨，都唔知佢係咪因為腳短嘅關係，起腳速度零舍快。
子瑜已經擘大隻眼怒睥住我。
「好好玩啊？死啦你陳佑男。」
跟住子瑜喺個洗手盤度執起堆泡，抹落我塊面度，仲要係雙手並用嗰隻，我醒起子瑜有鋪癮鍾意玩水，今次我就真係自己整咗個氹俾自己踩喇。
但係我都絕對唔可以示弱嘅！！
「黃子瑜！睇住嚟...我要還手！」
「還吖，睇你點還。」
面對子瑜嘅處處進逼，佢好似使出咗宮家六十四手咁，每一招都暗藏住無窮無盡嘅變化，每一下都可以好準確咁將啲泡泡黐落我塊面度，相反我只可以喺空隙之間偶然還到一兩手。
再拆三招，我已經俾佢逼到埋牆邊，成面都係泡。
「呼...」但見子瑜胸口起伏住喘緊氣，再將手上面剩餘嘅泡泡大大力咁拍落我心口度，然後捉住我件衫唔放。
抖咗一陣氣之後，我慢慢開始發現，子瑜唔係因為打鬧完而喘氣。
佢耷低咗個頭，神色好似有啲唔妥。
「子瑜...」我嘗試扶起返佢隻手，但佢就堅持捉住我件衫，唔肯俾我扶返正佢個身。
除咗外面淅淅瀝瀝嘅雨聲從來未停止過之外...
我仲聽到，一陣陣柔弱嘅啜泣聲...
「子瑜...做咩事啊？有咩事起身慢慢講。」
但子瑜一味喺度擰頭，啜泣聲同雨聲漸漸連接咗一齊。
呢個時候，黃子俊失驚無神走咗入嚟廚房，拎住我部電話遞俾我。
我正想話佢做咩嚟得咁唔合時...
點知下一秒鐘黃子俊就話。
「陳佑男！有個叫曉琳bb嘅人係咁打俾你啊，佢好煩啊，我幫你cut咗佢好多次線㗎喇，但佢依然係咁打俾你。」
我同子瑜幾乎一齊擰轉面望住黃子俊，我已經心知不妙，因為我唔記得咗今晚同曉琳有約。
我望一望個電話螢幕。
仲響緊...
來電顯示：曉琳bb
跟手我諗都無諗就搶咗個電話即刻接通。
「喂，曉琳？」
「你做咩唔聽我電話啊...」好彩曉琳把聲唔似發緊脾氣。
同一時間，黃子俊發現佢家姐神色有啲唔妥，直接走埋去佢家姐度。
「黃子瑜你...」一把𡃁仔聲已經衝口而出。
只見子瑜出盡力揞住佢細佬個嘴，唔俾佢再出聲。
直到呢刻，我先至望清楚子瑜嘅臉容。