【校園／愛情】戀上鄰家女孩（布甸篇）: 41. 有人歡喜有人愁

話說上星期五我俾Miss Chan罰留堂，結果原來只係叫我去買嘢食氹班女仔，但隔咗兩日我已經無咗回事，諗返起佢仲叫我趁星期六日去買，然後星期一返學請班女仔食，但明明今日星期一係中秋補假唔使返學，唔知邊個搞到Miss Chan咁大頭蝦唔記得咗今日係假期（其實係作者腦殘筆誤）。

「嘻嘻，你先係大頭蝦，咁重要嘅任務都唔記得咗。陳佑男～～今日放學落嚟教員室見我～～」曉琳呢個百厭妹，曳到喺度扮Miss Chan口吻。

「如果你做Miss罰人留堂，班男仔實會好曳。」

「點解啊？」曉琳疑惑咁望住我。

「因為佢哋會為咗見多你幾面，爭住俾你罰留堂。」





「哈哈，到時候我邊個都唔罰，剩係罰你一個！」曉琳舉起手指指住我。

「咁你會罰我做咩先？」

「欸...我要罰你陪我...」無端端我哋嘅對話變咗做師生戀情節。

我同曉琳嘅第一次正式約會大概就去到呢度暫告一段落，我哋留低咗啲嘢喺呢個地方，又多咗啲嘢喺我哋手上面，亦都喺呢個地方帶走咗啲嘢。

至於我哋帶走咗啲咩？我哋搵咗間好有異國風情嘅鋪頭，曉琳精心挑選咗幾盒朱古力俾芯玲佢哋，成個感覺其實好似我哋兩個去完旅行，臨飛之前買手信咁。





「曉琳，我終於知點解我八達通有咁多錢喇！！因為我將Miss Chan嗰二百蚊用埋嚟增值。」我捉住曉琳手臂急道。

「哦～你呃老師錢，今晚罰你留堂。」

搭返中環嘅嗰程船，曉琳上船無耐就挨住我膊頭，仲瞓到流晒口水，咁梗係啦，呢個傻妹今朝咁早起身，唔眼瞓就奇。

據我所知，雖然曉琳從來不乏追求者，但都俾佢一一拒絕晒，由中一至中三都無拍過拖，如無意外我就係佢嘅初戀男朋友，對佢嚟講，今日發生嘅事應該好多都係佢嘅第一次，而我都深刻咁感受到曉琳對於一段愛情嘅投入程度，因為我嘅小小舉動，佢就記咗喺心入面，然後為咗報答返我，會願意付出返加倍嘅努力同心思去對我好。

突然間我有股由心而發嘅感動湧在心頭，不由自主咁伸手將曉琳緊緊攬實。





「今日真係好多謝你。」

不過曉琳而家瞓到咁稔，我估佢應該都唔會聽到我呢句說話。

船靠岸。

「嗯...做咩你個膊頭濕晒嘅？」

「因為有人係咁流口水。」

我輕輕捏一捏曉琳塊面珠墩，佢傻更更咁望住我笑，跟住就扁扁嘴抹一抹嘴角，然後又醒起要撥返好自己啲瀏海。

送完曉琳返屋企之後，抬頭仰望天空一片彩霞，同對上兩次幾乎無異，我又沿住條斜路踏上歸家之路，但即使今日我同曉琳過得再甜蜜都好，返屋企嗰陣，無可避免一定會經過子瑜屋企門口，望住佢屋企道鐵閘，又點可能完全無任何感受。

呢幾日，我已經試過無數次回想返起近排同子瑜講過嘅每一句說話，同埋我哋之間嘅每一個互動，好多時候我都會覺得，明明我已經有曉琳，唔應該再喺度胡思亂想，但係呢一秒我控制住自己唔好亂諗，下一秒個腦又彈返晒啲畫面出嚟。





當有曉琳喺身邊嗰陣，可以靠甜蜜沖昏下頭腦都還好，但到自己一個嘅時候就...

真係好討厭...

第二日返學，壁報板比賽結果出爐，Miss Chan喺早會期間，當住全班面前，大讚曉琳同芯玲幾個女仔嘅努力，咁班女仔固然就好開心，雖然Miss Chan全程無提過我個名，不過我都習慣咗俾班主任遺忘，所以有無讚我都無咩所謂。

當然我都戥曉琳開心，畢竟佢已經連續四年攞到呢項殊榮，相信創校以來都無人達到過呢個紀錄。不過比賽過後有人歡喜自然有人愁，我反而更加在意坐我隔離位家樂而家個狀況。