【校園／愛情】戀上鄰家女孩（布甸篇）: 35. 但願君心似我心

當我想回頭質問黃子瑜嗰陣，牆角早已空空如也，剩低嘅只係得返佢陣餘香，而佢個人已經向住課室門口方向逃跑緊，即係佢趁我頭先鬆懈嗰剎那間，成功擺脫咗我嘅圍困。

「咪走啊你！！」見到黃子瑜一跑，我就幾乎自動波追住佢跑。

但當我追到出課室門口，就見到黃子瑜同走廊個男仔迎面相撞，仲要係撞到應一應嗰種，嚇到黃子瑜花容失色，差啲失平衡跌親，而個男仔俾佢撞到手上面疊單行本跌到成地都係。

嗱...黃子瑜你係咪衰呢，撞到人喇...

我望一望呢個男仔，確認唔係我哋班同學，見佢呆咗咁望住黃子瑜，表情有啲不知所措，我好心上前幫佢執返啲單行簿，依稀見到姓名嗰欄寫住「X家樂」，但因為呢個姓太多筆劃，嗰陣我真係唔識讀。





誰不知呢個時候，我感覺到後頸一陣濕淰淰嘅感覺，情不自禁打咗個冷震，即刻揞住條頸，你個衰女包竟然趁我幫緊人執嘢嗰陣偷襲我！？將啲水抆晒落我條頸度？

「嘻嘻！呢個係報仇嚟㗎，鬼叫我差啲俾你夾死。」

黃子瑜一邊勁得戚咁望住我，一邊拍走手上面剩低嘅水滴，顯然對自己頭先嘅偷襲計劃係相當滿意。

事情暫告一段落？仲未完…

隔咗陣，子瑜又再行開咗，曉琳放低手頭上嘅工作，走過嚟拉一拉我衫袖問我：「陳佑男，咩嘢係『差啲俾你夾死？』」





我窒咗秒，諗咗一諗，但我直覺話俾我知，我唔想將我同子瑜相遇嘅故事分享俾任何人知，於是答：「鬼知佢講咩！黃子瑜黐黐地線㗎。」

原來由嗰一刻開始，我就決定欺騙曉琳，守住我同黃子瑜之間嘅秘密，親近如曉琳亦唔想俾佢知道。

曉琳聽完之後微微一笑，雙手抱胸走開咗，但我聽到佢細細聲喺度自言自語：「好羨慕你哋…」

細聲到我幾乎聽唔到佢講咩。

曉琳返咗埋位之後，只係低頭默默咁執緊啲勞作，無再出過聲，我諗返啱先我係咪俾咗一個失望嘅答案佢…但我既然選擇咗行呢一步，都已經無得再返轉頭。





「陳佑男！！」又係黃子瑜把聲…

我擰轉頭見呢個衰妹個樣不懷好意，又唔知想點樣整蠱我，但最莫名其妙嘅係，呢一次我聽到子瑜嗌我個名嗰陣，我竟然有種期待已久嘅感覺。

諗返起，頭先同黃子瑜你追我逐嘅時候，我哋兩個當咗同樣喺課室嘅曉琳完全唔存在咁，當黃子瑜撞到隔離班嗰男仔亦無動於衷，似撞到件死物多過撞到人，感覺上好似有股無形力場將我同黃子瑜包圍住，跟住將我哋同外界事物徹底隔開。

唔通真係正如曉琳所講，我同黃子瑜係一個願打一個願捱，喺度打情罵俏？但對於當時嘅我嚟講，要將黃子瑜成日老點我同整蠱我嘅原因，諗成係因為對我有意思所以先咁做，點講都好我都覺得有啲匪夷所思。

不過點都好，我哋第一年嘅壁報板設計比賽就喺我同黃子瑜吵吵鬧鬧之下謝幕結束，憑住黃子瑜出色嘅主題構思，同埋曉琳專業嘅美術指導，最後加埋我任勞任怨嘅技術支援，成功為我哋班贏到第一個班際冠軍，我哋三個瞬間變成班裡面一舉成名嘅人物，呢個冠軍亦都見證住我哋三個之間嘅友誼正式開始…

咦？乜我唔係同曉琳煲緊電話粥㗎咩，點解無端端我又搬返中一啲前塵往事出嚟講，仲要子瑜前子瑜後，唔怕曉琳唔鍾意咩？

無計啦，我哋傾電話傾咗無耐之後，曉琳好快就開始攰到咿咿吟吟，到最後剩係得返啲鼻鼾聲，我就知道，呢個傻瓜肯定食完藥之後，藥力發作恰著咗都唔知，咪剩返我一個人，但我又唔捨得再cut佢線。

但你知喇，一個人夜闌人靜嘅時候，總係特別容易亂諗嘢…





過咗陣…

「呃…我瞓著咗喔...」電話話筒再次傳嚟曉琳嘅聲線，將我從回憶當中拉返嚟現實。

「傻瓜，瞓醒喇？」

「嗯…我瞓咗幾耐啊？」曉琳啱啱瞓醒把聲，咬字仲有啲唔清唔楚，但反而更加惹人憐愛。

「而家九點幾喇，差唔多有兩個鐘。」

「吓咁點解你唔收線嘅...？」

「唔捨得囉，想陪住你。」





「嘻～乜你對我咁好㗎咩。」

就算而家只係隔住電話，但我都可以感受得到曉琳爛漫嘅笑容，只係我唔知自己有無信心，可以保證到呢份笑容，能夠一直維持到永遠。