【校園／愛情】戀上鄰家女孩（布甸篇）: 33. 初見乍歡，久處仍怦然

時光再次倒流，返到嚟中一上學期，某日放咗學之後…

「等埋啊～」我邊跑邊嗌。

好彩我跑得快，成功喺部𨋢閂埋門之前攝到入去。

入到去，先發現有個熟口熟面嘅女仔發晒狂咁猛咁㩒個閂門掣，原來係黃子瑜！

「哎吔...夾佢唔死。」黃子瑜一副失望嘅表情。





嘩…心腸壞得你吖...

隔離仲有粒著住小學雞校服嘅豆釘，一臉天真無邪咁拖住黃子瑜隻手，一睇就知係佢細佬。

「黃子瑜你做咩要夾死佢？」粒豆釘抬高頭問佢家姐。

「因為呢條友上個禮拜想夾死我。」喂黃子瑜你唔好教壞細路先得㗎。

「我邊有...」





「哦～咁下次我一齊幫手㩒，一齊夾死佢！」粒豆釘忽然好似得到一件新玩具咁，勁興奮。

正所謂雙拳難敵四手，唔通我陳佑男終有一日要命喪喺呢兩姊弟手上？

成程𨋢就得我哋三個人，而佢兩姊弟你一言我一句咁，完全當我透明，但其實每一句都係針住我嚟講。

「20樓，Twentieth Floor，升降機門正在打開。」

𨋢門一打開，子瑜就湊住佢細佬行先一步，我就十足個外人咁跟喺後面，咁我又真係外人嚟嘅…





瞓醒覺第二朝返到學校，早會唔使集會留喺課室無嘢做悶到傻，而坐我隔離嗰個又唔出聲，於是我決定做破冰使者。

「喂黃子瑜，你咁記仇㗎，嗰日我唔係真心想夾死你㗎。」

「係㗎啦，記足你一世添啊。」黃子瑜托住腮，神情冷漠。

救命啊…有無咁小氣啊…

究竟呢個女仔點先肯相信我當日純粹係手殘㩒錯掣...

呢個時候班主任話有嘢要宣布：「各位同學，嚟緊就係壁報板設計比賽，呢個係我哋學校每年學期初都會舉辦嘅活動，為期一個禮拜，目標就係整靚我哋後面呢塊壁報板，有無邊位同學本身畫畫叻，或者覺得自己有藝術天份嘅，或者有責任心，想自願放咗學之後留低喺課室幫手㗎？」

運動細胞我就有，藝術天份？唔好搞我，都唔知咩人咁蠢先會自願留堂做義工。

點知坐我隔離個黃子瑜第一個舉手，我簡直瞬間傻眼，佢隻手仲要舉到好直，撐到件校服有啲繃緊。





「好，子瑜最乖，仲有無同學想自願幫手呢？」班主任滿心歡喜咁望住我哋，似係期待緊下一個水魚出現。

「我做！！」

我都唔知我哪來的勇氣，總之而家隻手舉到直一直，又唔知係咪我嗌得太有霸氣，而家搞到全班同學目光都聚焦落我度，仲好似聽到有女仔笑聲。

「好，有男仔幫手都係好事，仲有無其他同學願意一齊加入佢哋呢？」喂班主任唔讚我嘅…

「Miss Wong，我都想幫手啊，可唔可以啊？」嘩…呢把聲咁清純、咁溫柔，我即刻趷高個頭望吓究竟係何方神聖，諗諗吓仲覺得佢把聲幾似頭先偷偷地笑我嗰個女仔，但又唔記得咗佢叫咩名。

「當然可以啦，咁就拜託你哋三個負責喇，其他同學如果想幫手嘅話都可以搵佢哋…」

就係咁，我同黃子瑜，再加另一個唔記得咗佢叫咩名嘅女仔組團，成為咗壁報板比賽嘅負責人。





如果你問我點解當初會舉手自願留堂做義工？其實我都唔知點解，可能只係一時衝動，或者只係心血來潮，總之嗰刻我見到黃子瑜舉手，我就有股衝勁舉埋一份，我唔知係咪因為當日我唔小心㩒錯掣夾親佢，我唔知係咪因為佢係我第一個認識嘅中學同學，我都唔知關唔關佢住喺我對面事，抑或係我心裡面覺得佢其實好靚女，總言之，我想留返個好印象俾佢，所以我明知自己同藝術絕緣，但係我都想留低課室陪佢一齊做，希望佢會因此而對我改觀。

就係咁，放咗學之後，其他同學都執書包撇人，而呢個時候，今朝早另一個舉手嗰個女仔，就行埋嚟我同子瑜面前。

「子瑜你好啊，我叫曾曉琳啊，我係今朝舉手想幫手整壁報板嗰個女仔啊，我坐喺嗰度㗎...怕你哋唔認我。」

原來係叫做曉琳，個名又改得幾好，但當佢指住自己個位嗰陣時，其實我無認真去望，剩係覺得佢生得好靚，皮膚又白，笑容又甜，同埋把聲真係好好聽。

「Hello啊，我認得你啊，你咁靚女點會唔認得～」咁我隔離呢位其實都唔差，你同佢根本上就係不相伯仲，係對我惡咗啲啫。

「咁你呢，你叫咩名？」曉琳望住我問，鬼咩？頭先班主任又唔讚我又唔提我個名。

跟住黃子瑜就企咗起身，翹住曉琳隻手，對住我擺出一副不屑眼神：「佢？閒人嚟㗎咋，唔使理佢㗎喇，我哋兩個傾吓整啲咩仲好啦。」

喂！使唔使咁啊子瑜姐...家陣我想識女仔都唔俾。