【校園／愛情】戀上鄰家女孩（布甸篇）: 31. 夜來幽夢忽還鄉

傾傾吓，姑娘終於嗌到曉琳個名，好彩醫生都話無咩事只係小小感冒。我哋攞完藥行出診所之後，曉琳就捉住我手臂係咁搖、係咁chok，似足個小妹妹扭爸爸買玩具咁。

「買嘢食～買嘢食～我肚仔餓喇...餓扁喇...」曉琳講完就翹住我手臂行。

帶完呢個小妹妹又飲又食之後，佢都開始攰到語無倫次，我捉住佢手仔餵埋佢食藥，再氹佢早啲返屋企休息。

返到曉琳屋苑樓下，佢住嘅地方同我同子瑜完全係差天共地，佢屋企係一座私人屋苑，即係有保安叔叔主動開門同你打招呼嗰種，我咁大個仔都係第一次接觸呢啲高級地方。

保安叔叔離遠見到曉琳已經認得自己個住客，準備開門之際，曉琳就係呢個時候停低咗。





「陳佑男，你係咪剩係鍾意我一個㗎咋？」

「傻瓜，當然喇。」

「咁你掂過我啲口水尾以後就要聽晒我話㗎喇...」

「呃？」

我都未get到曉琳呢句話嘅意思，佢就哄埋嚟錫咗我一啖。無呃你...保安叔叔可以做證。





「又係你話嘅，今日第一日係例外，所以要紀念下，goodbye kiss嚟㗎，byebye～」

「byebye喇。」

我忽然間，覺得呢一個吻別好似嚟得特別沉重，係代表住我對曉琳嘅一個承諾，同時間我都感覺到曉琳對我嘅感情，遠遠超越我原本所想像嘅。

錫錫完之後，曉琳興奮到好似細路女咁跳跳紥走向屋苑大門，保安叔叔笑到四萬咁口拉開道玻璃門迎接曉琳。

「唔該龍叔～」曉琳停低同保安叔叔好有禮貌咁點頭道謝，然後又擰返轉頭向我揮手道別，曉琳佢又靚女又有禮貌，莫講話我，連保安叔叔俾佢都電到暈。





曉琳入咗去之後，龍叔仲離遠向我點咗一下頭。做咩啊！？我未結婚㗎，無利是俾你...

我即刻擰轉身逼開龍叔視線，望吓個天一片晚霞，遠處嗰幾幢公共屋邨就係我同子瑜嘅屋企，今晚個天色幾乎同上一次送曉琳去補習嗰晚一模一樣，而好似曉琳呢種咁靚女，身材又正，又識嗲人嘅女仔，同佢一齊個感覺真係好舒服，有個咁鍾意自己嘅女仔，夫復何求？

不過我仲有啲好重要嘅事情唔可以唔理，我拎返部電話出嚟，望一望個鐘，已經過咗六點半，未接來電就有三個，全部都係子瑜打過嚟，我輕輕一撥打返俾佢。

嘟...嘟...嘟...

搞咩啊你個黃子瑜，頭先打俾我咁急，而家打返俾你又唔聽，仲要連續打咗俾佢兩次都無人聽，係嬲咗我頭先無聽電話？

我沿住啱先行上嚟條斜路一邊行返屋企，一邊諗緊子瑜究竟因咩事連續打咗三次電話俾我，嗰段時間一早就過晒壁報板比賽deadline時間，肯定唔會係搵我過去救佢命。

不過佢而家唔肯聽我電話，我都唔會知道個答案。

直至我返到屋企，我先可以從佢鐵閘上面個氣窗透出嚟嘅光線，大概估到子瑜應該都返咗屋企，但其實都係靠估，因為佢媽咪呢個鐘數仲未放工，而子瑜就應承每晚都會煮飯俾佢細佬食，理應好少咁夜都未返。





但除咗估佢已經返到屋企之外，對於子瑜喺我離開班房出去追曉琳之後所發生嘅事，我都係一概不知，但我又好想知，那怕佢屋企傳出一粒聲都好，我哋只係隔咗嗰兩步路距離，有時候黃子俊個死仔包講嘢大聲啲我都可以聽得一清二楚。

攤咗喺梳化一陣，電話忽然間震，我幾乎本能反應咁拎出嚟睇吓係咪子瑜打返嚟。

原來係曉琳。

「喂喂，你返到屋企未啊？」

「返到喇。你做咩唔休息吓啊？」

「咁我掛住你嘛...」

於是乎，我哋隔住個電話，傾咗啲咩？都係啲講完隔咗兩分鐘我已經唔記得嘅話題，不過都有重點嘅，原來曉琳每個禮拜日都要陪爹哋媽咪family day，即係無得同我出街拍拖。





「喂～咁你而家做緊咩啊？」曉琳問。

不過同曉琳傾電話都無咩壓力嘅，因為呢個女仔總係有源源不絕嘅嘢同你講，把聲又好聽，但就係呢個時候有電話入，我即刻拎起一睇。

來電顯示：子瑜

仲響緊！我要把握時間接先得！

「曉琳啊？」

「嗯？」

「我媽咪打俾我啊，轉頭打返俾你得唔得？」

「嗯嗯，梗係得啦，快啲聽啦，乖仔～」





「好。」

於是我就cut咗曉琳線，趁佢仲響緊嘅時候，對準個綠色接聽掣一㩒。

「喂子瑜？」