【校園／愛情】戀上鄰家女孩（布甸篇）: 24. 但沙漠永恆不變

連堂嘅英文堂簡直係噩夢，但對於家樂嚟講，我諗呢個半鐘應該更加煎熬難捱，佢成堂不斷搵機會偷偷地喺櫃桶度搞佢啲勞作，而我就負責幫佢睇水，好彩Miss Lau對眼無耳仔咁靈敏。

臨落堂嗰陣，家樂開始執好櫃桶裡面嘅半製成品，急不及待準備捧住堆顏色紙衝過去子瑜個班房。

「我過去啦。」

「嗯。」

家樂走咗無耐，我發現佢剪到自己個位成地都係紙碎，呢啲細細張嘅紙碎最麻煩、最難執，掃把都無可奈何，只可以用手慢慢逐張執，但係我同曉琳尋日研發咗一招秘技，就係用牛皮膠紙將佢哋黐上嚟，簡單方便又快捷，當我揸住卷牛皮膠紙耷低頭開始黐嘅時候...





「喂陳佑男你做緊咩啊？」聽聲都知道又係你哋Visual Arts三姊妹，今次調返轉頭輪到佢哋當中樣貌最好嗰個女仔率先發言。

「執緊垃圾，你要唔要過嚟幫手？」

「咦～你同曉琳尋日搞咩呢，整到間課室咁污糟？」而第二輪發言依然係由樣貌最好嗰個女仔負責。

「講乜鬼啊？唔幫手就算。」

「喂講返正經嘢先，尋日曉琳有無交帶低塊壁報板仲有咩要整啊？」明明就係你唔正經在先，但我抬頭一望，先知原來三姊妹剩係得佢一個喺度，其餘嗰兩個唔知去咗邊，唔怪之得今輪質詢俾佢壟斷晒所有發言環節。





咁禮貌上我應該要介紹返佢俾大家認識，呢個喺Visual Arts三姊妹當中樣貌最好嘅女仔叫芯玲。

「曉琳尋日話，睇吓你哋仲有咩需要整，叫我幫你哋手，不過我諗都無咩特別嘢要加啦...」我好認真咁複述返曉琳尋日對我嘅交代。

「嗯嗯，你哋都整好晒啦，最多幫你哋兩個張相中間加多粒心心好唔好？」芯玲越講越興奮。

「加埋俾你囉好唔好？」

「我先唔要！喂～咁你一陣Lunchtime同唔同我哋食啊？」講講吓芯玲仲要踎低埋喺我面前，頂吖...似曾相識嘅畫面，但陰我唔到嘅，繼續專心黐紙碎...專心黐...





「唔啦，你哋食啦。」呼！終於黐好晒啲紙碎。

「唓！無曉琳喺度就唔同我哋食！唔同你玩啊！」芯玲就咁走咗去，而我黐完啲紙碎就梗係拎去掉咗去～

捱多兩堂又鐘聲響起Lunchtime的訊號。

家樂同我講，佢哋要用埋Lunchtime呢段時間趕工，連埋放咗學嗰個半鐘，先至勉勉強強夠時間完成，我話咁我去幫你哋買外賣返嚟食，但我都未嚟得切問佢想食咩，佢已經一枝箭咁衝咗出去，愛情嘅魔力真係大...連食咩都可以唔理。

但其實都唔使諗食啲咩啊，我哋呢個組合，最簡單就係沙嗲牛肉麵，亦都係最好嘅選擇，咁就一於去返上個禮拜子瑜帶路嗰間好有文青氣氛嘅茶餐廳，叫咗三碗沙嗲牛肉麵，廚房仲好好人幫我分埋湯，等我唔使未拎到返學校啲麵已經淋晒。

「喂...開飯啦，吊頸都唞吓氣㗎。」我將三碗麵拎到埋去子瑜個位，再慢慢解開膠袋結，將一碗又一碗仲係熱焫焫沙嗲牛肉麵放好喺枱上面。

「喂喂喂，再唔食就凍㗎啦。」我見子瑜對住塊壁報板諗到入晒神咁，剩係得家樂一個擰轉身過嚟幫手拆筷子袋。

「子瑜由今朝到而家都好似無食過嘢，我朝早買咗個麵包俾佢都唔知佢有無食到，我諗係得你先勸到佢㗎咋...」家樂垂頭喪氣，細細聲哄埋我耳仔邊講。





就係咁我先終於組織到，原來今朝家樂嗰袋麵包係買俾子瑜，大概係佢朝早返咗嚟，知道子瑜無食早餐，所以出咗去外面買，但又趕唔切喺打鐘之前拎俾佢，亦因為咁佢小息嗰陣就拎住個麵包一枝箭衝過去搵子瑜。

你個傻妹做乜嘢啊？由尋日放學開始就奇奇怪怪咁，尋晚過去佢屋企食飯，已經見佢無厘胃口咁，而家又唔肯食嘢唔通你真係想減肥啊？定係想餓到暈低？

「黃子瑜...」我行埋子瑜側邊，細細聲嗌佢個名。

「嗯？」佢認認真真咁對住堆顏色紙一味喺度沉思苦惱中，只係好隨意咁應咗我一聲。

「你食啲嘢先再做啦好唔好？」

「未肚餓住，等我做多陣先吖。」子瑜拎住把鉸剪喺度剪圖案，唉你細佬反而仲乖過你啊，起碼一嗌食飯就識放低個手掣去幫手開飯枱。

「乖啦好無？唔食嘢會餓壞㗎。」





「我減肥。」又係呢句，尋晚你細佬問你做咩唔裝飯嘅時候已經講過一次，好彩我今次都有備而來...

「咁我陪你一齊減囉，我都唔食。」我直頭膽粗粗轉身扮離開，博吓用激將法呢招睇吓有無效。

「唔得啊，你唔准唔食。」幾驚你真係會眼白白由得我轉身走咗去，如果係咁我碗麵都唔知點算好，見子瑜有啲落搭，於是我乘機再補多句...

「我買咗三碗㗎，你陪我一齊食，如果唔係我都唔食喇。」我擔咗張凳坐埋喺子瑜對面，托住腮一路咁望住佢對水汪汪嘅雙眼，子瑜剪剪吓發現有個癡漢一直望住佢...

「做咩啊？」子瑜尷尷尬尬咁撥一撥兩邊瀏海。

「等緊子瑜嗌我食飯。」

子瑜終於忍唔住噗哧一聲笑咗出嚟：「好喇...我剪埋呢張就嚟。」

總算叫做氹到呢個細路女肯放低手頭上嘅工作，坐低三個人一齊開飯。食完之後，我快快脆執好啲碗筷，諗住加入戰團，只可惜食飯鐘聲好快又再響起...