【校園／愛情】戀上鄰家女孩（布甸篇）: 5. 留給你的波板糖

無條件加更～

曉琳走咗之後，我哋三個跟住都去埋單，子瑜話趁仲有少少時間，想去間舊式糖果屋買啲零食俾曉琳，然後夾硬使開咗鄒家樂，捉咗我陪佢去一齊揀。 

「開心啦，曉琳食晒你啲口水尾，間接接吻啊。」子瑜拍拍我手臂笑道。 

「子瑜你係最好人嘅～」咁樣可以算係間接接吻？而家莫講話要我陪子瑜揀零食，就算佢叫我做咩我都肯。 

「哼哼！頭先有人好似嬲緊我㗎喎。」子瑜交叉翹手放喺胸前。





「邊個咁衰啊？我幫你教訓佢！」我回應說。 

「算喇，嗰個人無心肝㗎。」子瑜說道。 

成個揀糖嘅過程，我一直跟喺子瑜後面，佢好專心咁研究緊貨架上面嘅零食同價錢，我就唔覺意望到佢條黑色bra帶，若隱若現咁喺條白色校裙度透咗出嚟… 

子瑜揀咗一輪之後，最終拎起咗筒朱古力橡皮糖，就轉身走去收銀處，好彩我反應夠快即刻轉移視線，應該無俾佢發現我對眼望緊啲咩… 

「喂喂～我個銀包啊…我要俾錢呀。」子瑜企喺收銀處面前呼喚緊我。 





「等我一陣，好快…」我突然腦海閃過一個念頭。 

「搞咩啊你？」子瑜著急了。 

我喺貨架上面極速咁拎起咗支布甸狗波板糖，收埋喺背脊後面，再衝返去子瑜隔離。 

我行到子瑜隔離，同佢講話不如我幫你俾錢買，但子瑜話唔制，因為呢筒朱古力橡皮糖係佢揀俾曉琳嘅，如果我都想送嘅話，就自己另外揀一樣嘢送俾曉琳，咁先至有誠意。 

於是我唯有伸隻手入褲袋度，摷返佢個銀包俾佢，只不過佢俾錢嘅時候唔知係有心定無意，咁啱身體擋住我個視線，所以我望唔到佢銀包裡面裝咗啲咩咁厚。 





子瑜俾完錢之後，跟住到我支波板糖埋單，我又學返佢咁用個身擋住佢視線，等佢都唔知我買緊啲咩。 

老闆娘笑笑口咁找完錢之後，我轉身就將支布甸狗波板糖，遞喺佢面前：「嗱，黃子瑜唔好話我無心肝喇，送俾你㗎。」 

「嘻，咁好死啊。」子瑜好開心咁接過我支布甸狗波板糖，拎住嚟玩得好興奮，成個細路女咁。 

行返學校嗰程路上，佢幾次擰轉頭望過嚟我度，想扮嬲但係又嬲唔落，嘴角似笑非笑咁，分明就係自己喺度暗爽緊，個表情好過癮。 

原來氹女仔開心，有時候可以係咁簡單。唔知道我又有無機會可以咁樣氹到曉琳開心呢？ 

我回想返起，子瑜雖然無應承話同我一齊食晏，又無答應會幫我追曉琳，但頭先餐飯所發生嘅事情，我直覺認為絕對唔會係純粹恰巧咁簡單。 

唔通真係當你好想好想得到一樣嘢嘅時候，成個宇宙都會一齊嚟幫你實現？ 

臨返到課室嗰陣，我忍唔住問子瑜：「你點知曉琳今日晏晝會喺嗰度食嘅？」 





「哼～我自有辦法知喇，你唔好問咁多。」子瑜講完就轉身小跳步彈返入課室。 

從剛才曉琳喺餐廳第一眼見到子瑜個驚喜表情，就話俾我知，唔會係曉琳講俾子瑜知佢去邊度食，咁究竟子瑜係點樣知㗎呢？ 

黃子瑜你咁叻女，幫我可以賺到一次同曉琳間接接吻嘅機會，抵我犧牲一日嘅零用錢去買糖俾你食，忽然間我好期待下一次子瑜又會有啲咩新計仔。 

上堂鐘聲再度響起，我繼續偷偷咁望住曾曉琳個背影，心裡面默默暗唸：「我一定會追到你。」