【校園／愛情】戀上鄰家女孩（布甸篇）: 2. 別忘記梳好頭髮

「鈴…鈴…鈴…」Lunchtime時間到。 

「陳佑男你咁急去邊啊！？又想撇甩我唔同我食晏？」我當前要務梗係要撇甩家樂，廢事俾佢知我約咗子瑜食晏，我眼尾睄到子瑜嗰班啲同學已經喺走廊遊蕩緊，所以我拿拿臨執好張枱，衝去子瑜班房門口等佢。 

與此同時，曉琳仲快過我，匆匆忙咁離開咗課室。都明嘅，因為上個禮拜佢俾中五班師兄睇中咗，邀請佢做今屆嘅藍社康樂幹事，約咗佢同其他幹事今日Lunchtime一齊食飯認識下。 

差啲唔記得講，我同曉琳都係藍社，但係子瑜同家樂係黃社，本來子瑜都有俾啲師兄邀請做黃社社幹事，但係佢話怕麻煩唔想應酬，用專心讀書嘅理由拒絕咗。 

「黃子瑜啊，咁慢㗎你。」 





我見子瑜唔喺班房門口，而佢班房裡面啲同學又走得七七八八，所以我索性直接闖入佢班房，坐喺佢個位面前催佢快啲，如果唔係再遲啲我怕會俾家樂發現。 

「嬲你呀！你搵我食晏，咪又係想我幫你諗點樣追曉琳，哼哼！」子瑜雙眼睥住我，兩邊紅腮又微微鼓起。 

「好啦好啦，黃子瑜係最好人，唔會咁易嬲我嘅。」雖然佢話嬲我，又俾佢睇穿咗我約佢食晏嘅目的，但係其實都係跟住我後面行出班房，我諗女仔都係鍾意口不對心嘅？ 

點知一行到出走廊，諗住轉身行另一邊樓梯避開人群，就見家樂喺走廊嘅遠處向住我揮手大嗌：「喂陳佑男原來你喺度啊！」仲要向住我哋個方向衝過嚟… 

呢個時候，我隱約聽到子瑜匿喺我背後噗哧偷笑，我只能心裡暗叫不妙，全身不能動彈，瞬息之間家樂已經跑到去我面前。 





「Hihi，鄒家樂！」子瑜喺我身後，向右彎腰突咗個頭出嚟同家樂揮手打招呼。 

「呃…子瑜你喺度嘅？…Hello…」家樂隻手舉到一半又放返低，舉啲唔舉啲咁。 

我見家樂錯愕個表情，先知道原來佢一直都無為意子瑜匿咗喺我後面。 

都係嘅，我而家個身型已經可以完全遮住子瑜嬌滴滴嘅身驅，但家樂你做咩成個人硬晒舦，你上年下學期咪坐過人哋隔離囉，你兩個嗰陣時仲要玩得好開心㗎喎。 

「咁不如一齊食喇～」子瑜喺我背後向橫移咗一步，突咗半個身出嚟同家樂講。 





「喂黃子瑜你…」我擰轉頭細聲喝停子瑜，如果叫埋家樂一齊食，咁我哋仲點樣傾秘密啊。 

「一齊行啦，我肚餓啦。」但係子瑜完全無視咗我。 

就係咁，我個如意算盤已經打唔響，兩個人飯局變咗三個人。 

「等我一陣！我去個廁所先！」當我哋三個差唔多行到男廁門口嗰陣，家樂一個箭步衝咗入廁所，而我就諗住趁呢個機會「質問」黃子瑜想搞咩。 

「我知你想問我，做咩叫埋鄒家樂一齊食。」點知道我都未開口，就俾佢搶咗先機。 

「你信我喇，我唔會害你嘅。不過一陣間你同家樂傾多啲偈啊，唔知點解佢今日見到我好似好緊張咁。」子瑜拍拍我膊頭，一輪嘴說道，我擰轉頭望住佢嘅時候，佢又鼓起兩邊腮擰歪面。 

「哼！未嬲完你呀不過。」其實子瑜嬲個樣都幾可愛，皺起眉頭嘟起個嘴，搞到我都有啲衝動，想伸隻手指去篤下佢塊金魚腮，而且我知道佢唔會真係嬲我嘅。 

好喇，黃子瑜我相信你會幫我嘅，之但係鄒家樂係咪跌咗落屎坑，去個廁所都搞咁耐。 





正當我諗住喺男廁門口大嗌鄒家樂之際，佢就迤迤然咁喺廁所行出嚟。唔…原來搞咁耐就係為咗恤個靚髮，咁無問題喇，我諗都唔使我撩佢傾偈喇，佢而家個樣容光煥發充滿自信，溝死女都似。