[少甜][愛情][校園][真人真事改編] 自從我爸爸過左世，我遇上左佢: 1
仲記得我細細個既時候老豆老母都好鍚我，因為我係獨生子，所以可以一個人得到哂佢地既愛。
而就喺我升小四嗰年，老豆就因為地盤既意外而過左生，我地一家三口幸福既日子亦都暫告一段落。
細細個就怕生既我，性格變得更加孤僻，剩下的幾位朋友亦都漸漸咁離開哂。
直至到有日，我媽媽開始執野入行李箱，包括我同佢既衫褲，嗰時既我好驚，好怕佢要送我去孤兒院
講真，諗返起都覺得低能，如果係送我去孤兒院咁佢執佢既衫褲做乜鳩，不過算啦，小學雞係咁弱智。
「希希，我地會搬去楊姨姨到同佢地住啊。拿，你去到記得唔好無禮貌啊知唔知。」阿媽其實好後生，個樣都幾靚，但自從老豆走左之後佢都殘左好多。
「知道。」仲係小學雞既我，咩都要跟隨住阿媽，同埋老豆走左之後我更加珍惜剩低既呢個親人。
我跟住阿媽行下行下就到左楊姨姨嗰度，因為我地其實住附近，所以車都唔洗搭
「希希，我地好耐冇見啦。」楊姨姨個樣我都仲記得，佢都同阿媽一樣，好後生。
咦，楊叔叔呢。嗰時既我唔知道楊叔叔同老豆一樣，已經過左生，難怪楊姨姨個樣同阿媽一樣，殘左好鬼多
「姨姨你好。」我好乖咁向佢打番聲招呼。 「希希，你好啊。」一把好温柔既聲，一隻好白既手摸住我個頭，呢個就係楊夢兒
因為阿媽同楊姨姨係好朋友，所以我同夢兒細細個都有一齊玩過，雖然稱唔上好朋友，但喺我印象中，佢係一個好乖，好靚，同埋好好人既姐姐黎
冇錯，佢大我兩年，所以好多時都係佢帶住我去玩，而我都幾享受同佢一齊玩既時光
後尾阿媽同我講番，原來係因為老豆剩餘既錢唔多，佢都要出去揾錢，又唔放心成日要我一個人，所以就去揾楊姨姨合租。
一黎可以互相照應，二黎可以慳錢，一舉兩得，但估唔到既係呢個決定改變左我好多
小學冇咩朋友既我，唯一鐘意做既就係打籃球。我老豆以前係甲一球隊既球員，所以喺我細細個既時候已經培養我既球感
而我一直都好鐘意打籃球，拍波，射波既感覺我認為冇野比得上。但點解我冇參加校隊?
第一，根本冇人知我識打波，雖然我鐘意打波，但唔會喺學校到打。
第二，啲人真係太垃圾，唔係我自信，係真係佢地太撚廢。打全場我有信心一個可以過哂佢地。
所以我寧願每日放學自己去做自主訓練，都唔想同學校班垃圾打波。
-------------------------------------(我是分隔線)------------------------------------
而自從搬左去同楊姨姨佢地住，我就發現，楊夢兒實在太可怕...
今日係小四既下學期，亦都係同佢地一齊住既第一日。
朝早嗰時我同楊夢兒一齊返學，因為我地讀既係同一間小學。
相比起我，楊夢兒喺我地小學非常之咁受歡迎 -- 讀書又叻，又係風紀隊長，仲要係芭蕾舞校隊隊長，完全就係風雲人物
而我就只係個small potato，咩都唔係， 好多時上堂都係訓教。
「其實你有冇諗過入咩中學，中學想讀咩科，大學想入邊間...(下省3000字)」冇錯，短短返學既路程我一直比佢係咁轟炸
確實，喺佢眼中我真係同廢物冇咩分別，每日就係等夜晚訓教，都幾可悲下。
「喂啊，你認真啲答下我得唔得啫，你想唔想進步架。」佢開始有啲炆。
「其實我真係冇咁大理想，不如你都係留返啖氣暖肚啦。」我一路吹自己隻手一路講，冬天真係好凍。
「算，你繼續一事無成啦。」佢雖然有啲嬲，但都同我一直行番學校。
放學之後我冇等佢，反正佢識自己返屋企，而我就衝左返屋企，換左套運動服，帶住粒波就去左附近既街場。
呢個街場隔離就係個公園，好多情侶都會黎拍拖，而同時亦都係陪住我成長既地方。
由細細個開始我已經成日喺度同老豆練波。我老豆三分好鬼準架，我仲記得嗰時佢灌到籃，唉講起黎就掛住佢。
而我一直以黎都好想超越佢，估唔到仲未超越佢佢就已經走左... 唔理啦，開始做啲拍波訓練暖下手先。
好多時啲叔叔都會揾埋我去鬥波，因為佢地都識我老豆，亦都會就下我。不過其實所謂既就我啫係唔打身體咁解。
但老實講，都係多得佢地，我既球技先會勁過同年人咁多。話就話佢地會讓我，但佢地都唔會比我輕鬆咁打。
好多時如果我唔用運球拉開空間，佢地都會好無情咁封蓋我，久而久之我就明白到，咩位人地封到我，咩位人地封唔到可以起手。
雖然佢地冇我老豆咁勁，但業餘黎講佢地都真係好有料，嗰啲高中學生黎親都比我地打到走哂，最後又變番我地圍內鬥波。
直到我岩岩好練完最後一球零度三分，呢班阿叔就黎到啦。
「喂希仔，咁早就到啦。」嗌我既呢個阿叔叫偉哥，佢好撚柒高架，起碼有一米九四。
「咁曳曳啊希仔，功課都唔做就黎打波。」調戲我既呢個叫狗叔，因為佢跑得好撚快，成隻狗咁，所以佢地叫佢做阿狗。
「我喺學校做哂啦...」講完我又入左球三分。「哇希仔越黎越準啦。」講呢句既都係射手黎，佢叫大B，因為射手好多時都要隊友照顧，所以佢地話佢成個巨嬰咁，就叫大B。
其他既有機會再介紹啦，始終呢三個我最熟。好快就有啲高中生黎鬥波，我同偉哥狗叔同大B同佢地打4v4
呢班中學生着住件校隊背心，以為自己好型咁，點知好快有個就比我既crossover 扭到佢ankle break左，我仲聽到佢班fd笑佢比個小學生過爆。
點知佢地換左幾次防都係守唔住我，甚至triple team我都係比我拉杆打爆佢地。
呢班阿叔其實真係好好人，我無限咁單打都冇屌過我唔傳波，反而仲會幫我搶板，幫我pick咁。
隨住我既第7球三分，佢地已經比我地打爆左第四場，佢地成班中學生同黎嗰時個樣唔同，已經又喘氣又趕咁急急腳走哂，又變番我同班阿叔打。
打到差唔多六點，我見個天就黎黑我都執野換衫返屋企，因為其實我阿媽係唔比我打波打咁夜，佢平時限我四點半就要返屋企。
大佬，我三點先放學，佢限我四點半就要打完波返屋企，都唔鬼合理，所以我平時都會呢個時候先走。
「喂auntie，希希岩岩先返到啊，係，唔該哂，bye bye auntie。」我聽到呢個對話，呢把聲，我就知67了
「咦，希希你返黎啦。」楊夢兒，太可怕啦，佢竟然向我阿媽打小報告...