火機: 八.

「喂，大佬你舊嘢用唔到架喎。」我將佢個火機放返喺枱面。

我拎自己個火機出嚟點煙，而佢就個火機收返落褲袋。

「你唔揼咗佢？」我問佢。

仲收埋佢做咩？都用唔到。

「點解要揼？」佢反問我。





「都用唔到，做咩要留低？」

「我哋身邊有好多嘢都用唔著，咁係咪要全部揼曬佢？」

比佢咁樣一問，我真係唔知點答。

我哋兩個沉默咗一陣，佢終於開口。

「對唔住，No offence嘅。」佢斟酒：「我自罰一杯。」





講完，佢就即刻拎起酒杯。

我諗住阻止佢，但佢唔洗兩秒已經清空咗隻杯。

「其實冇咩喎。」我繼續講：「我反而有啲好奇，想聽多啲。」

我知我咁講佢一定會開始講經，不過既然佢好似有嘢想講就比佢講下啦。

「你有冇諗過，一樣嘢有冇用，係取決於邊個用同點樣用？」





「呢個我聽過啊，但係火機冇油好似真係咩用都冇。」

「咁又唔係嘅，可以入油架嘛。」

「吓，呢啲咁嘅垃圾火機有得入油嘅咩？」

佢拎返個火機出嚟：「梗係有啦。」

佢將個火機底Show比我睇，我見到有個針窿咁嘅嘢，應該就係入油嘅位。

「就係呢個窿？」我問佢。

「無錯。」

「但係唔會好麻煩咩？」





又要買火機油，又要喺個細窿到灌入去，諗起都覺得麻煩，比著係我真係寧願買過個新嘅。

「少少啦，我初頭都覺得好麻煩，不過而家都冇咩嘢。」

「搞咁多先用得返，比多十蛟買個新嘅唔好咩？」

「的確係嘅，但係有時做一樣嘢，最緊要唔係方唔方便，而係因為佢背後嘅意義。」

「你意思係你幫啲垃圾火機入油係有特別意義？」

「你可以咁講。」

「願聞其詳。」





「好長架喎，你唔介意？」

唔出都出咗嚟啦，聽埋先走囉。

「唔介意啊，你講啦。」