時光突然倒流，打完飛機啲精縮返入龜頭: （22）

嗰個人用把劍「行」住自己條頸，過咗一陣又放返低。

如此場面令我聯想起項羽烏江自刎。

佢將把劍收入劍鞘，再擰轉身。

我一望佢個樣，心諗唔係呀嘛！我老豆嚟嘅喂！

佢身上著住一件染血嘅盔甲，滿面濃密嘅鬍鬚，頭髮凌亂但飄逸，舉手投足間散發出一股懾人嘅霸氣。





佢呢個款可以話相當切合，我心目中項羽嘅形象。

佢拎返起支「楚旗」，隨即以極快嘅步速行過嚟，並騎上我背脊。

我發現自己唔再係一個人，而係一匹馬。

一匹身中多箭嘅馬。

負傷嘅我，載住項羽aka我老豆離開江邊，馬不停蹄咁後退，速度快到嚇親人。





我完全唔使睇路，全程倒後狂奔。

感覺好似兩分鐘都唔使，我就跑過幾個山頭，帶我老豆嚟到沙塵滾滾嘅戰場。

昔日項羽率領嘅楚軍打輸俾漢軍，導致到要敗走，本來有機會逃走到江東，但自覺無面目見兄弟父老，最後選擇自刎身亡。

適逢時間倒流，所有嘢倒返轉咁發生。

我地先係離開烏江，再重返沙場作戰。





古代打仗成日吹到千軍萬馬，點知原來真係得個「吹」字。

楚軍加埋漢軍都只係得兩匹馬，同埋約莫一百個士兵，連一千人都無。

騎住匹馬並帶領漢軍嘅係大嘜，唔知佢係韓信定劉邦。

佢班麾下嘅士兵，大部分又係同佢一齊嗰班mk仔。

兩軍人馬交鋒，戰場上揚起陣陣風沙。

可能打仗嘅人身手特別敏捷，個個人嘅動作都快如閃電，快到我幾乎都睇唔清。

項羽aka我老豆忽然跳落馬，赤手空拳咁同漢軍士兵埋身肉搏。