時光突然倒流，打完飛機啲精縮返入龜頭: （5）

時間好快倒退嚟到早上九點半。

今朝我食咗個隔夜菠蘿包做早餐，家陣成個包嘔返出嚟，再入廁所刷牙洗面。

啲泡越刷越少，最尾成條牙膏完整咁刷返出嚟。

至於我嘅精神狀態變返啱啱訓醒嗰陣咁，成個人無嚟精神。

返入自己房後，我攤返上張床度，好明顯準備要將琴晚訓過嘅覺，再訓多一次。





合埋眼嗰吓，我期望當自己再擘大眼嘅時候，一切會回復返正常。

只可惜，結果卻不如人意。

當再打開雙眼，時間係夜晚。琴日臨訓前嘅嗰一晚。

失望嘅我想嘆氣，但身體卻喺度打喊露。

身體依然不受控制，我行落床，倒後行出間房。





接落嚟，我就將前一日做過嘅事，從尾到頭回帶再做一次。

身為一個外賣仔，我每日嘅生活就係日頭送外賣，夜晚收工返屋企，然後就沖涼訓教。（咁啱琴日放假，所以先話打算去叫雞破處。）

家陣喺時光倒流嘅世界入面，一切都倒轉曬。

首先沖涼都唔可以再叫做沖涼，因為個身從乾淨變返污糟。

第二係送外賣變咗做「收外賣」。





我逐家逐戶去回收嗰啲送出嘅外賣，帶返去餐廳。

班廚房佬再將煮好嘅飯菜，還原成各種原材料。我老細就退返啲錢俾顧客。

喺收外賣嘅途中，我見到街上面嘅人同車，同樣係「身不由己」，跟隨住時間倒流嘅擺佈，而後退逆行。

講真，呢種身體不能自住嘅感覺實在好唔爽。

究竟時光倒流到幾時先至會停？

一個禮拜？一個月？定還是一年？

最後發現統統都唔係，我全部都估錯咗！