是咁的，我無啦啦收到隻戒指: 十一

戒指盒裡面傳嚟碰撞嘅聲音，感覺有啲唔尋常。

啊聖搶過個戒指盒：「點解嘅？」

「係咪唔應該會有碰撞聲？」我問佢。

「正常如果係原裝盒，應該係唔會有。」

「你琴日開嘅時候冇發現？」





「我冇Expect會有啲咁嘅事，所以冇特別為意。」

我同狗卷向佢點咗點頭，然後啊聖就將戒指盒放喺枱面打開。

佢撳咗撳托住隻戒指嗰舊紅色綿，然後舊紅色綿凹咗落去。

「唔係原裝盒嚟。」啊聖望住我。

我向佢點咗點頭，然後佢就好小心咁將條鍊同舊綿一齊抽咗出嚟。
我望到戒指盒底有一封好細嘅信，個信封應該係手摺嘅，因為可以明顯見到佢四邊都唔對稱。





啊聖將條鍊同舊綿擺埋一邊：「你嚟定我嚟？」

我向佢打咗個眼色，然後翹埋雙手。

佢拆開封信，裡面係一張正方形嘅紙仔。

啊聖睇咗一陣，然後就皺曬眉頭。

「咩事？」我問佢。





「如果你睇到呢封信，證明你嘅解謎能力無下降過，繼續搵落去就啱架喇。」

「都寫到咁，睇下後面有冇嘢。」

啊聖反去後面：「ideq…」

「你比我。」

佢將張紙擺喺枱面，上面係一串冇意義嘅英文同一個英文詞，仲有一串數字。

「ideq relw rs eq ​​​​​​​

     sttswmxi 1226 Caesar」





「你睇唔睇得明？」狗卷問我。

「Caesar？好熟。」我喺個腦裡面搜尋咗一陣。

如果我冇估錯，應該就係嗰一個加密方式。

我喺電話到撳咗陣，好快就知道答案。

「我哋可以起行。」我收埋電話。

「吓，去邊？」佢兩個同時問我。

「Ma On Shan Maze」我直接做埋翻譯員：「馬鞍山迷宮。」

我將條鍊歸位，將個戒指盒放咗落褲袋就行咗出去，而啊聖、狗卷同啊金都跟咗出嚟。





「咁我行完Program個結果幾時話比你聽？」啊金喺後面大嗌。

「行咗先啦，搭緊車嘅時候同我講。」我撳𨋢。

佢哋都冇再問，直接跟咗出嚟。