《為咗寫故，我同隔離班嘅偽女神假扮情侶》: 第一筆 網絡小說作家

「阿響！即刻同我起身！」靚女班主任miss張一聲令下，我點敢唔起身？

我捽住眼慢慢拮起身，心入面好奇點解坐角落位，加上前座係一個身型碩大嘅肥仔，miss張都可以睇到我偷偷瞓覺呢？

不過，好快得到解答。

「你個死八婆…」

我睥住坐喺我斜前面嘅路伊凡，事關佢而家正擰轉面對我擺出一副伸脷嘅小可愛表情。





會唔會太得意…唔係，係可惡先啱。

點解miss張知我瞓覺？擺明係路伊凡篤我背脊啦。

吖，講咁耐都唔記得介紹自己，我叫…

＝＝＝＝＝＝＝＝＝＝＝＝＝＝＝

「陳德藝。」有人敲我枱面同我講，打斷咗我正在打字嘅動作。





我即刻放低部電話。

抬頭一睇，係miss黃，靚女班主任——廿年前。

「專心啲。」

我敷衍咁點頭，心裏屌鳩佢斷我靈感。

事關鹹魚翻身，係靠呢一次。





是咁的，我係網絡小說作家。

話說一年前，因為某啲原因，我開始寫咗我人生第一個故，係一個口語寫嘅修仙小說。

可能因為題材冷門，喺討論區同紙言都冇咩迴響，不過總算有一批真心粉絲。

寫吓寫吓，大概半年左右就完咗故啦。

唔知試過寫故嘅大家有冇試過，寫故真係會上癮架，完咗故之後冇得日日同讀者互動，硬係有啲唔慣，於是我開始萌生寫新故嘅念頭。

題材，就當然係歷久不衰嘅校園愛情故啦。

而喺而家中文堂，我就開始用手機落筆，男主叫做阿響，女主叫做伊凡，故事就係講佢地之間發生嘅點點滴滴，由相愛到分開。

但給大家所見，寫咗幾行，已經俾靚女班主任屌鳩。





佢走咗之後，我繼續打，終於喺放學前趕得切寫完第一章！

「喂阿藝，寫故寫成點呀？」講嘢嘅係阿名，我老死。

「發揮得唔錯，唔係條老嘢阻住晒，我應該可以寫完兩章。」

「即係寫完一章啦？拎嚟睇睇？」

我將手機遞俾阿名。

佢一邊睇一邊點頭，表情有啲耐人尋味。

話晒第一次寫校園愛情故，我點會唔緊張？





所以佢睇完之後我有啲焦急咁問：「點呀點呀點呀？會唔會有人睇呀你覺得？」

「冇咩大問題，不過……總覺得爭啲嘢。」

「爭啲咩？」

阿名諗咗一陣，然後好爽快咁講：「諗唔到！」

「屌你……」

「妖，你就放上討論區試吓反應先啦，我覺得爭啲嘢啫，或者其他人會鍾意呢！」

「你知道我原本寫修仙嘅，讀者已經少架喇，如果連佢地都唔鍾意今個故，就真係搵鬼睇。」

「唔會，就算你寫得幾差，我都會支持你。」阿名拍拍心口，然後同我碰拳。





有時我會慶幸，我有阿名呢個好兄弟，唔理發生咩事，都會喺身邊支持我。

「話晒，你會開始寫故，都係為咗佢…」阿名變得一臉低落。

一聽到個佢字，個心又開始痛起嚟。

無以名狀嘅痛。

「夠喇。」我叫佢唔好再講。

「點都好，放咗上討論區記得俾條link嚟呀。」

「嗯。」答應佢之後，我地就各自返屋企。





然後，趁食晚飯之前，再修訂寫好嘅第一章。