盛夏85天的我們: 第二十二章 傾城

第二十二章 傾城

夏夜令人悸動的晚風，播下了許多顆愛情的種子，足夠幸運的話，風甚至可以讓種子飄揚於無數個盛夏，走過四季。

少年與女孩的足印逐漸遍布著沙灘，他們靜靜牽著手，漆黑裏緊張而曖昧的氣氛讓暗生的情愫開始浮現起來。

「想行到邊！」
「就呢到啦，一陣搭船番去唔洗行咁遠」
「咁我坐低㗎啦！」
「唔好住，我要拎啲野先」





遞過手中的菲林相機給她後，我從背包中取出沙灘席，鋪蓋在較為平滑的沙地上，再拿出藍芽喇叭，播放著一個已預備好的歌單。

「請坐低！」
「笑死！原來你個袋就係裝呢啲野，唔怪得咁重啦」
「作為一個細心嘅男人，隨身攜帶呢啲野好基本！」
「邊有人咁讚自己㗎！」

平靜的海面映照著碼頭的霓虹燈光，漸漸消散的烏雲讓月色皎潔的照耀於天空，浪濤潮汐與蟲嗚的聲音交織不斷，彷彿在這朦朧夜色下輕奏著一首小夜曲。





「好靜呀呢度」
「真係，我都好耐冇試過咁夜睇海」
「對上次咁睇都中學啦」
「一年前？」
「咩一年前，都話我畢左業好耐！」
「哈哈！我記得調音嗰陣仲問你係咪讀緊書」
「比你激死！你仲要我影張證書比你睇先信」
「有冇少少似去買煙比人check身分證嘅感覺」
「但我都唔食煙！」
「講起煙。」





我舉起手輕輕感受著風向，然後緩緩點起香煙，此時音響播放著一首很平靜而治療的歌曲。

「啲煙應該吹唔到去你度啦？」
「又話戒煙！」
「望住呢個景真係差枝煙呢~」
「不過你識啲野喎，我都好鍾意傾城」
「仲要係霓虹黯色果個version先正！」
「佢mv入面好多霓虹燈我都影過，但好多燈牌依家都拆左了」
「真呀！想當年我都成日去油麻地果邊影」

「不過香港好多野都慢慢消逝緊。」

空氣彌漫著一縷縷青煙，思緒也伴隨著煙絲默默飄到遠方，浪濤一次又一次的拍打著海岸，如同要我從迷霧中清醒過來。





「你知唔知要點樣正確觀賞呢個景」
「用眼睇？」
「錯曬啦！你等我一陣」

我把背包裏較硬的雜物取出，把藍牙喇叭放進去，再把背包推到她的身後。

「真心一級享受嚟！你試下訓落去」

她躺在沙灘席上，把頭枕在播放著音樂的背包上，歌曲在她耳邊回放著，人聲真實的感覺一下一下直接衝擊著腦海。

「痴線…好似真人係我耳邊live緊咁，同埋你睇下啲星！」

女孩默默地凝望著夜空，臉上逐漸浮現出歡快而滿足的笑容，而那刻少年在她的眼神裏，彷如看到一個不曾看過的未來。

「嗯，真係好靚。」





//傳說中 癡心的眼淚會傾城
霓虹熄了 世界漸冷清。//