盛夏85天的我們: 第十八章 對焦

我們牽著手一路走著，去到了沙灘旁的小型遊樂場，遊樂場裏全是木頭和樹幹打造的設施，她看到一個用麻繩和小木頭綁起來的鞦韆，便過去坐下。

「我隻腳太長啦！」

她縮起身子，雙手捉著鞦韆的繩子，穿著的皮鞋已經埋進沙子裏，如此夏日風情的穿搭令她完全融入了這一片樹林，而在翠綠的景觀當中，一張紅色的膠椅卻令這個畫面充滿戲劇感，我把握時機拿起相機，在我按下快門的一剎，她望了過來。

「下你影左㗎啦？影到我好矮喎應該！」
「我夠膽講呢張一定靚！雖然你成個小矮人咁」
「你話邊個小矮人話？」





她站起來，在鬆動的沙子中踮起腳尖。

「雖然你趷高腳係會高啲，但始終改變唔到你矮過我嘅事實！」
「車！你啱啱識我嗰陣仲成日話我高過你」
「咁嗰日係你屋企得你有著拖鞋咋喎，我赤腳㗎喎！」
「好串下喎你依家！不過你係咪話過要再調多次」
「係呀，你又會記得嘅」
「當然啦！係咪要歌頌我了」
「緊係！等我仲擔心緊你有痴呆症」





一場死亡追逐戰的號角聲從此響起！可惜這場戰役只持續十多秒便宣告結束，全因這一個年紀老邁的人類，已經沒有年輕時的魄力和活力跑動，而此刻的我，就坐在那張紅色膠椅上。

「唔得啦阿叔冇力啦！唞唞再玩」
「好心你廿幾歲人咪學人扮老啦！」
「冇計啦可能食得煙多！呢獲要戒啦」
「你次次都咁講架啦！」
「又比你發現左！不過你洗唔洗坐下」

看著站著的她感覺好像有些疲憊，於是我牽起她的手，示意她坐在我的大腳上。





「認真嘅？我好重㗎」
「點會呀你咁瘦~得㗎啦」

就這樣我和她在搖搖欲墜膠椅上一同坐著，眺望著遠方，而那個在海邊掘硯的老人又再一次出現在我們的視線。

「我比個任務你，你見唔見到同你好似嗰個阿叔，幫我影下佢！」
「其實想講好耐，人地好似係嬸嬸嚟」
「我哋唔好深究呢啲野住！不過用我呢部影啦，廢事銀住你」
「你呢部我唔識用㗎！教左我先啦」

她舉著相機嘗試一下對焦，我把手放到她按著快門的右手。

「見唔見到右上角有條紅色嘅線，呢部機有自動測光架，你半按嗰個快門，紅線就會話你知而家嘅光圈係用緊幾多」

她輕按放在快門的小手指，此時紅色的指揮棒不停在機內揮動著





「真係有郁喎！咁我要用幾多光圈先啱」
「依家呢個光度5.6都得㗎啦，快門就用125」
「痴線好似好先進！」
「你講到你未用過菲林機咁喎」

隨即，一下又一下的快門聲傳入我的耳邊，她專注地對焦著整個世界，海邊老人、樹林，溪流與碎石，都是她想要定格的畫面，而我想留住的世界，卻只有眼前這一個女孩。