我在英倫身兼數職的日子: 第四章: 開工實戰到出糧
由Take 左offer到部公司電腦送到屋企用左一星期， 從此就開始我在家既工作， 工作類型同性質同我早年在香港做散仔既時候差唔多， 都係做development 野比較多， 寫下sql query 咁，
在外資公司對既同事全部係鬼佬其實都已經慣哂， 心想幾容易適應喎同香港無咩分別改變唔多，放工香港有時都仲要去happy hour 應酬下， 宜家在家工作人都唔使見， 專心做毒L !
由其是當我知道英倫公共交通費好貴， 坐兩個站地鐵最低消費係£3.5一程， 閒閒地坐轉火車都十幾鎊， 呢度都慳唔少車錢同時間。硬要講生活有咩改變，當然係屋企大左成倍， 兩公婆一人一部Benz(呢度歐洲車同日本車同年份同車款同價， 唔係唔買雙B 下話？）仔女返學都無問題， 最緊要係唔會有香港人（利申： 我選擇既地方當時2020年真係99.9%白人， 學校真係無一個香港人）點解要咁要求？ 因為我唔想好似90年代移民加拿大嘅親戚子女一樣， 全部圍爐， 結果係中文好過英文， 讀左等於無讀， 由於英文唔可以native, 當地發展自然一般， 回流香港反而係最勁英文那班人， 就正正因為回流香港比到佢哋工作，機會， 事業， 家庭， 所以回流既人大多支持政府， 反正有咩事可以即走！ 我唔想仔女重搯復轍， 第一件事就係唔可以圍爐！ 2020年雖然有Covid 封城， 但當時無人爭樓爭學位好輕鬆！對比宜家樓同學位全爆， 宜家過嚟就比較辛苦啦。
講返出糧， 第一個月無風無浪， 只係同我直屬上司同期入職， 其實當時我都覺得麻麻地， 因為經驗所得， 上司下屬同期入職而下屬唔係佢請， 通常都唔多like, 就係呢點就埋下之後既伏筆。
當收到第一份糧時真係感覺好少， 原來呢度出糧之前已經扣左稅， 基本上公司幫你報埋稅而且出糧之時會即，連埋NI (國民保險) + pension, 第一份糧就比左事頭婆差唔多4 成， 所以我第一份糧所得應該係我香港份糧大約一半再一半既人工， 真係少到單係應付日常開支唔使交租都唔多得， 哎，唔通呢世就豆份咁既糧？