[hehe單元日記]《四個八公的故事》: (15) 12-7-2014　星期六　。杜小峰。

12-7-2014 星期六 。杜小峰。

　　說句老實話，我很羨慕他們三個。
 
　　老鼠雖然父母早逝，但他有個很堅強而且很愛他的哥哥；林伯一家似乎關係疏遠，也很少聽他說家庭的事，不過始終是一家人，尤其是他兩個姐姐，有什麼問題三姊弟一定互相幫忙；Toby的繼父是中產人士，即使Toby後來獨立出來社會，他身邊的男友還是駱驛不絕。
 
　　我呢？只有一個曾經將我禁閉的母親。
 
　　自從她加了我Facebook好友之後，她好像比從前更關注我。有時候我放一些自拍照或是分享生活近況，通常她都是第一個說讚。就像她約我飲茶一樣，不會說任何話。
 




　　好啊，你說想多了解我不是嗎？想和我多交流不是嗎？好，我就試著在你的照片下留言。星期三她和幾個朋友去附近的大會堂表演粵劇，幾個師奶拿著一把粉紅摺扇，面上塗脂抹粉，差點比真正的「大戲妝」還誇張，我本著時裝設計系學生尊業的態度嘗試給她們一點建議說：「個妝有小小問題，特別係最右邊嗰位姐姐，下次有機會可以搵我幫手。」我已經持非常中立的態度。媽媽沒有回覆，反而那個姐姐居然這樣說：「joanna，你有個咁關心你嘅仔仔真係令人羨慕。」旁邊還有兩個笑容。
 
　　看到了嗎？這樣才是嘗試搞好母子關係的示範。
 
－－－－－－－－－－－－－－－－－－－－－－－－－－－－－－－－－－
 
　　「我肯定個姐姐係串緊你。」老鼠說。
 
　　星期六夜晚，在Aloha中，我們正在玩「我是大老闆」。這款桌遊主要玩的是談生意，分利益，所以是口才和人緣的遊戲。遊戲中只有老闆才可以主導利益分配，其他人只能遊說老闆和誰做生意，但經過我們的改良後，老闆不只可以主導利益分配，也主導著聊天的方向。
 




　　「收皮啦，I am the boss！」當然，遊戲有卡牌可以隨時交換老闆身份。Toby拍一拍我繼續說：「你洗乜理啲師奶點講啫，最緊要你阿媽知道你係真心想幫佢咪得囉。仲有，我要一千萬，你三個自己分淨返嗰一千萬，其他唔洗講。」
 
　　「但係我媽無覆我喎……我要三百萬得喇。」
 
　　林伯加入戰團說：「你又唔係唔知你媽媽不嬲都唔識講野，可能佢唔知點覆你啫。」林伯拍出一張卡片後再說：「飛起你個紅色員工，咁唔洗預你啦？Toby，我同你兩個分，每人一千萬好無？」
 
　　「嘩！你咁狗嘅？」失去紅色員工的老鼠翻遍身上的卡片都找不到符合這次生意要求的員工，只得放棄。
 
　　「而家姐姐就係話俾你知，後宮波譎雲詭，唔好咁易信人，今次你好明顯就信錯林伯喇。」Toby已經準備將兩張一千萬和林伯平分。
 




　　「喂呀！講埋我媽單野先得唔得呀？」
 
　　Toby簡直楊怡上身。「妹妹，做人嘅野邊諗得咁多？你永遠都唔知你媽諗緊咩，就算佢真係覆你話好喇，話唔定佢心又未必係咁諗？既然你媽連覆都無覆過你，妹妹你又何必自尋煩惱呢？」自從Tvb播了宮心計，金枝慾孽那一系列的宮廷鬥爭劇後，模仿妃嬪說話成了他的一大興趣。「得，有無人反對？無？三二…」
 
　　「我係你老闆！」這次出功能牌的人是我。「唔講我媽咁講第單，我要搬喇，因為我老友溝左條女……仲有，我同林伯每人五百萬！」
 
　　這時候他們三個都沒有出牌，也沒有說一千萬還是五百萬。
 
　　「多得濟？四百萬都ok…」
 
　　「是但啦，仲掛住玩！」林伯將兩張一千萬塞到我手中。「幾時要走？你搵到工未呀？」
 
　　「咁佢又無話一定幾時之前要趕我走……佢條女平時基本上等我一唔喺到就上去同佢啪啪啪，總之我一走佢就入正架喇。」
 
　　老鼠白我一眼說：「咁大獲你都可以而家先講，你都算好野。」




 
　　「嗱！我最憎人咁樣同我講野架！」
 
　　林伯勸阻老鼠後問我：「咁你諗住點吖？你有無同你媽媽傾過呀？」
 
　　「我岩岩先講完Facebook單野，佢連計都唔同我傾多句，你估佢伯唔會理我？」
 
　　老鼠不理林伯的勸說。「咁又唔係咁講呀，當初係你自己玩離家出走，伯母無趕你走架喎！」
 
　　「你而家係咪撩交嗌呀？」
　　
　　「算啦！」Toby這個大哥哥的角色總算可以發揮其作用。「咁老老實實，你而家到底有咩打算呀？」
 
　　我？打算？唉，我就是一個沒有打算的人，從來做人都是見步走步，當初離家出走，也只是碰巧這個朋友搬出來自己住，要是我沒有遇到他，我可能睡橋底了。如今我又能作什麼打算…？
 




　　我發出求救的眼神看著他們三個。林伯第一個說：「你望我都無用架喎，我仲同緊阿爸阿媽住…」Toby搖搖頭後說：「唔洗諗喇，我住公屋嘅，俾你訓幾晚就得，但係長遠一定唔係辦法。」最後餘下老鼠……
 
　　「望咩呀望，諗你都唔好諗呀，我同阿哥住，東涌又偏，村屋好多狗，你驚狗架，你……」
 
　　不只我，連林伯和Toby都開始看著老鼠。
 
　　「唉，好啦，我同我大佬講聲啦…唔擔保佢可以架，佢話唔得一樣唔得架。始終佢先係屋主！」
 
　　兩分鍾後。
 
　　「屌，佢一口應承左。」
 
　　「好野！」哈哈，老鼠的哥哥當然答應，他也曾經有過艱難的童年，應該最樂意出手助人吧？何況他那間村屋那麼大，多安置我一個人也不多！
 
　　重點是，我想要個哥哥很久了！哈哈，以後可要多多巴結他才可以。




 
　　「解決左就好啦。」林伯滿意地笑，但總覺得他笑得有點詭異。突然他大聲說：「I am the boss！Toby，一人一千萬！無牌喇掛！？」
 
　　「妖！」老鼠發脾氣地將我手中兩張一千萬搶過來，然後丟到他們兩人手上。
 
　　哈哈，老鼠經常說他姑姐是面惡心善（詳情參閱4-7-2014），但依我看來，他們全個家族都是面惡心善的人才對！