中六個年 我鍾意左叫我起身個女仔: 澄、晴(十九)

我哋落到樓下拉咗下筋，綁好鞋帶就開始向碼頭進發。

其實自從填完張報名表之後，我每一日都有去跑。

絕對唔係因為我想拖稿，而係我真係唔想到時咁柒。

我知到時柒就一定架喇，只不過唔想咁柒啫。

我同佢粒聲都唔出，就咁平排跑。





其實我好想撩佢講嘢，但我唔知撩佢講咩好。

嚟到上次個涼亭，我哋照舊跑咗入去休息。

佢坐喺其中一個角落，而我就坐喺佢嘅對角。

「做咩唔坐埋嚟？」佢問我。

「冇啊，我個身好熱，費事黐埋你到啦。」我用兩隻手喺到撥涼。





「嗯。」佢好似有啲不滿。

我有不滿，你有不滿，我唔會讓呢步。

但不滿還不滿，我都係想諗埋你嗰份。

我企起身：「你去買水，你要唔要？」

佢扤咗扤頭，然後拎咗部電話出嚟撳。





我行出去買咗兩枝水，然後見到遠處有個熟悉嘅身影。

為免世界大戰，我加快步伐行返入涼亭。

我喺佢身邊擺低枝水，然後坐返去佢對角。

我一邊飲水，一邊哨住出面。

飲飲下，我就見到着住灰色Sport Bra同真理褲嘅啊澄喺涼亭外面停低咗。

佢依家背住涼亭，而我都希望佢一直背住個涼亭，然後…

佢擰轉身。

佢向我揮咗揮手，然後行咗入嚟，坐喺啊晴對面。





而家涼亭裡面有一個標準嘅直角三角形，左上角係啊澄，左下角係啊晴，而右上角就係我。

啊澄望住我，我尷尬而不失禮貌地向佢扤咗扤頭示好。

同一時間，我眼尾哨到啊晴睥住我。

涼亭裡面充斥住火藥味，只要一有人點火，世界大戰就會開始。

大家都知咩事，只係等緊其中一個人開聲，但唔包括我。

因為喺呢一刻、呢一個處境，我冇權利發言。

喺呢一場大戰裡面，我係被動嗰個，淨係負責接波、卸波同傳波。