中六個年 我鍾意左叫我起身個女仔: 澄、晴(十八)

我屋企用嘅係儲水式熱水爐，但我就好鍾意沖熱水涼。

我一路沖，啲水就一路變凍，到最後凍到好似喺冰川遊緊水咁，但我都冇諗住閂水着衫，因為我全身都抗拒緊佢套衫。

我知我到最後都一定要着佢套衫上身，因為我唔着嘅話佢一定唔會放過我，但係呢一刻我只係想拖多一秒得一秒。

「沖快啲啦！等到變望夫石喇！」啊晴喺到拍我道門。

大佬啊，吊頸都要唞吓氣啦，而家要我着女裝咁大件事，比啲時間我做少少心理準備都情有可原啩？





「比多一陣得唔得啊？」我問佢。

「你一分鐘內再唔出嚟，我就開門入嚟切你Jer jer。」佢講完，出面就傳嚟兩下菜刀剁落砧板嘅聲。

答案顯而易見，我必須要喺一分鐘內着好佢套衫，如果唔係就疊埋心水斷後都得。

「收到！」我閂水。

我拎起佢套衫索咗一啖，上面充斥住啊晴嘅體味，真係好撚正。





着住佢就可以一直享受佢浸味，但諗起一間要着埋佢出街跑步，我就即刻興致大減。

「三十秒！」佢再催我。

喂，你唔好恰我無錶喎！半分鐘邊有咁快過？

我唔理三七廿一，一嘢將套衫笠落去，然後開門。

佢企喺門口望住我，一手揞住個嘴，好似喺到忍緊笑咁。





「着女裝，係搞笑啲架喇。」我好無奈咁講。

「唔係…」

佢未講完，就已經跪咗喺到撳住個肚大笑。

「有冇咁好笑啊？」

我都知好好笑，但都未去到呢個程度啩？

佢企返起身，深呼吸咗幾下：「你去照下鏡先啦。」

我同佢行去門口鞋櫃塊全身鏡到照咗下，然後…

我都笑埋一份。





上身就成個公園啊伯咁，下身就成隻猩猩咁多毛。

呢個都唔係重點，重點係咁着搞到我好似Gay佬咁。

我絕對唔歧視同性戀，但係…

我唔係啊！

我已經預想到一間出門口唔止會比人圍觀，我仲有機會比人搭訕…

比男人搭訕。

「我想問…可唔可以換第二套？」我喺度垂死掙扎緊。





「你話呢？」佢用手輕輕扣住我條頸。

「好，我哋出門口。」我輕輕推開佢隻手。

「咁先係架嘛。」佢錫咗我塊面一下。