中六個年 我鍾意左叫我起身個女仔: 澄、晴(九)

我已經唔知我到底飲咗幾多，亦都唔知到底淨返幾多，我淨係知我幾乎每分每秒都飲緊。

我已經進入半沉睡狀態，耍曬手擰曬頭。

「冇啦，飲曬喇。」啊澄拍咗拍我。

聽到呢句，我眼前即刻憑空出現咗隻天使同我講「醒喇柒頭，走得喇。」

「喂老細，埋單。」我舉手。





「嚟緊！」老細拎住張單行過嚟：「千八。」

我擺低錢，然後就S字形咁行出門口。

係新鮮嘅空氣，我終於知咩叫死過翻生。

「我走先喇。」佢轉身就走

「喂！」





「做咩？」

我諗住叫佢送我返去，但又好似好柒咁，都係算啦。

「無嘢喇，掰掰。」我坐喺石壆上面點煙。

食食下煙，我對腳前面多咗個影，有人企咗喺我左邊。

我望過去，視線只係淨返一條線，咩都睇唔到。





好攰，對眼完全擘唔大。

「你認唔認到我？」佢對住我講。

係女人聲，但把聲有啲沉，好似啱啱喊完咁，同佢原本把聲應該好唔同，我認唔出係邊個。

我擰咗擰頭：「你邊個？」

「啊晴呀。」

啊澄？唔係走咗喇咩？

但又唔會係啊澄，佢嬲緊我。

仲有第三個叫啊晴？但除咗佢兩個，我冇識人叫啊晴。





「行啦。」佢踎低。

是但啦，都一樣，我估應該都唔會有男人扮女聲執我屍。

我一手搭落佢膊頭，同佢一齊踎咗喺到。

「起身喇喎。」佢一手攬住我條腰，一手捉住我隻手。

「嗯。」我扤咗扤頭。

我慢慢用力起身，然後失平衡坐咗落地下，佢都比我拉埋落嚟坐低。

「坐定。」





講完，我成個人就比佢抽起咗。

「企定未？」佢攬得更實、捉得更實。

我原地踏咗兩步，然後扤咗扤頭。

「咁行喇。」佢拍咗拍我搭住佢隻手。

我扤咗扤頭，然後佢就開始慢慢向前行，我一步佢一步咁。