中六個年 我鍾意左叫我起身個女仔: 澄、晴(三)

「點呀，咁樣食煙正唔正先？」佢問我。

「正係正，但唔建議。」我褪後兩步：「第一日識，唔好咁癡線。」

「一次生，兩次熟，三次大結局。」佢將煙頭彈向牆角，然後再一次璧咚我：「咁我同你就一日生，兩日含，三日床上䟴。點睇？」

「你話點就點啦。」

我講咩根本唔係重點，重點係我隻手喺暗中伸緊過去個門鎖到。





佢繼續璧咚，而我隻手已經掂到個門鎖。

我喺內心吶喊：機會嚟啦，飛雲！

一扭，然後用盡全身嘅力挨落道門到。

道門就咁比我推開咗，跟住我就跌咗落地下，而佢都反應唔切就咁跌埋落嚟。

跌落嚟都算，仲要壓住我，真係同TVB啲膠劇一撚樣。





我瞓喺地下嘆咗啖氣：「小姐你起身未？」

佢慢慢爬咗起身：「你唔偷走，我咪唔會壓住你囉。」

「你唔搞埋啲咁嘅嘢，我咪唔洗偷走囉。」我都爬返起身。

「你好似有道理。」

「梗係啦屌你，我哋第一日識咋，真係就嚟比你嚇撚死！」





「Sor鳩，蒲慣咗。」

「邊間Club有木枱木櫈？」

「好似又係。」

我哋望住對方…

然後笑咗出嚟。

「叮噹！」

「喂！」

響鐘嘅同時，有人向我呢邊嗌咗聲。





我望過去，見到啊晴企咗喺班房門口。

我向住班房行過去，而啊澄就向住二號梯行。

我嚟到啊晴面前：「件褸還咗喇。」

「我知啊。」佢語氣聽落唔太開心。

「做咩呀？」

「你唔止還咗件褸。」

「咩呀？」我喺到扮冇事發生過。





「無嘢。」

講完，佢就轉身行返入班房。

佢應該咩都睇到曬，我點兜都冇用。

我由窗口望入去，見到佢執緊嘢準備調位。

如無意外，佢會坐去課室最後面近走廓嗰個冇人嘅位。

我行入班房，佢即刻加快動作，一嘢衝過去冇人嗰個位，然後坐低。