中六個年 我鍾意左叫我起身個女仔: 直接

一推開門，我就Feel到好撚大風。

我喺佢手上拎咗隻杯擺喺地下，然後一放手隻杯就比風吹跌咗。

「有冇邊個位冇咁大風。」佢問。

「跟我嚟啦。」

我踩住一粒粒突起嘅石，向住天台一棟突起嘅嘢行過去。





我行到果棟嘢前面之後擰轉頭諗住望下啊晴行到邊，點知佢好似玩緊「The wall is lava」咁慢慢踩住石行緊過嚟。

我望住佢呢一個行為，笑而不語。

過咗一陣，佢終於嚟到我面前：「笑咩姐，人哋腳短呀嘛。」

「你有冇諗過，其實你可以行平路。」我指住佢後面。

佢擰轉頭望咗望，然後擰返嚟反咗個白眼：「屌！你唔早講？」





「我唔知你係盲架嘛…」

我講到一半佢已經睥住我，所以我都冇講落去。

「行啦。」

我推問防火門，行到最上面一塊細細哋嘅空地。

因為呢到係完全密閉，老實講有少少熱，不過因為前幾年冇咁多錢嘅時候都係喺呢個位飲，所以都慣咗，唔知佢O唔OK姐。





「呢到怕唔怕太熱？」我問佢。

「唔緊要啦，廢事又轉。」佢擺低枝Vodka同紙杯，就喺空地坐低咗。

我都擺低枝綠茶，之後坐喺佢隔離。

「你想點玩架？直接飲？」我倒出兩杯純Vodka。

「你揀啦。」佢拎起杯聞咗聞，之後咳咗下：「真係唔可以溝綠茶？」

「唔可以，溝綠茶只會更難飲。」我拎電話出嚟：「玩大話骰？」

「都無骰，點玩？」

作為骰魔，我玩大話骰嘅勝率近乎一百，梗係點都要玩。





「而家廿一世紀做嘢就現代啲，電話拎出嚟啦。」

講完，佢就拎咗部電話出嚟，撳咗幾下之後就遞咗比我。

我接手佢部電話，碌咗幾頁終於搵到傳說中嗰個令內地同胞們搖到電話都壞嘅App。

一撳入去，聊天室不出我所料地全部都係內地嘅親戚。

「快D啦。」佢催我。

「得啦得啦。」我撳入搜尋界面。

打完「大話骰」三個字，我平時用開嘅「超級大話骰」就彈咗出嚟，我撳入去之後就比返部電話佢。





「咁開始架啦。」我搖咗搖電話。

「飲死你…」

佢一邊講，一邊將自己個杯啲酒倒落我個杯到，以為我睇唔到，但事實上佢做得明顯到連盲嘅都見到。

不過算啦，當讓下佢都好。