中六個年 我鍾意左叫我起身個女仔: 影相日

嚟到第三日，都係每年一度嘅影相日，每一班都會空兩堂去禮堂影班相，而因為中六係最後一年嘅中學生涯，都係最後一次係中學時期影班照。

雖然我無心向學，但唔知點解都係入咗成績最好嗰班，所以就被安排做第一班落去影相，即係第一同第二堂要落去禮堂。

我都唔知學校到底係用咗咩方式嚟分班，先會將我呢個每科都係啱啱合格嘅垃圾擺入去呢一班。

睇住周圍嘅同學唔係一對就係一堆，我忍唔住嘆咗啖氣，唔單止係因為我冇朋友，仲有就係因為呢個影相嘅過程剝削咗我成個鐘嘅睡眠時間。

攝影師終於整好部相機，同學們都唔知點解突然變得好興奮，跳下跳下咁跳咗上嗰個用嚟影班相嘅樓梯，唯獨我係後面滋滋悠悠咁漫步過去。





唔知係驚我阻住攝影師收工，定係嫌我行得太慢，原本已經企好咗嘅向晴由樓梯跑咗落嚟，一野將我拉咗去最前面果排嘅正中央。

佢就好似兄弟咁搭住我膊頭，我原本想反抗，但係呢一切都嚟得太遲，攝影師已經撳咗快門。

跟住班主任要我地做各種手勢同姿勢，老實講我係拒絕嘅，畢竟我都唔識做呢啲奇奇怪怪嘅事，但係佢就一直陪係我身邊，好細心咁教我。

以往我對影班相嘅睇法就只是例行公事，但唔知點解今次感覺開心過之前。

終於影完相，班主任即刻行到相機前面欣賞成品。





「啊晴，你同啊武好有夫妻相喎！」班主任講咗個笑。

我有啲唔份氣，就行咗去佢側邊一齊睇。

第一眼睇冇咩特別，但係再睇多眼就覺得佢真係冇講錯。

屌，冇可能，冇可能會鍾意佢，呢個一定係果啲叫既視感嘅野。