我想喺夜場搵真愛，你陪唔陪我癲？: 四十四.

我跟住佢行，轉個彎就嚟到佢想食嗰間串串川。

我好快就用電話落咗單，而佢就仲睇緊。

「你咁快撳完嘅，嗌咗咩呀？」佢問我。

「冇咩特別，就係芽菜米線跟住麻辣中辣。」

「冇其他喇？」





「冇啊。」

我真係好鍾意食芽菜，而點解唔叫其他餸同嘢飲就係因為…

窮啊屌你。

食到銀包見底嘅飯係唔會開心架，只會一邊食一邊喊。

說時遲，那時快，香港人做嘢效率真係快，我哋兩碗米線都到曬。





佢嗰碗應該係過橋米線，成個鍋都係餸，而對比之下我嗰鍋就好少嘢，得嗰幾條芽菜。

因為我碗嘢真係好少，所以我好快就食完坐咗喺到撳電話等佢。

佢見我停曬手，就係咁夾嘢落我到。

「唔洗喇。」我夾返去。

佢再夾返嚟：「冇得唔食。」





「好啦好啦。」我見咁樣夾落去唔係辦法。

我一邊食，佢一邊講：「你要食多啲嘢先得架嘛，咁鬼瘦。」

「咁我驚你同我一齊瘦咗，比人話我冇比嘢你食啊嘛。」我講出我拍拖嗰陣嘅口頭禪。

「你咪諗咁多啦，成日掛住諗人，你自己瘦到成枝筷子咁。」佢繼續講：「愛人還愛人，記得都要理下自己。」

唔知點解聽到呢到，我有少少眼濕濕。