我想喺夜場搵真愛，你陪唔陪我癲？: 四十二.

轉眼又到禮拜四，係佢約咗我食飯咗日子。

一起身，我就諗起一個好重要嘅問題。

到底今日要食咩？

一係就唔諗起，一諗起就成個腦都喺到思考呢個問題。

食打卡Cafe？諗下自己咩職業、咩人氣同咩收入先啦。





食譚仔？我鍾意啫，無理由叫佢同我一齊食。

食M記？你估個個都係潮文女主角咩？無可能。

「叮！」

Whatsapp通知聲響起，我拎起一睇，問題瞬間解決。

「我哋今日去石門食。」





「食咩架？」我問佢。

過咗一陣，佢Send咗個嗰間餐廳嘅食評嚟。

食評唔係重點，因為我從來都唔睇食評，伏唔伏真係試過先知。

重點係間嘢叫咩名，間嘢叫串串川，所以我有合理理由懷疑間嘢係賣串燒。

「我哋今日去食串燒？」我扮曬醒咁問佢。





「我哋今日去食一鍋米線。」佢直接打臉我。

時間嚟到十二點九，距離放飯仲有三個字，而出面仲播緊片。

我仲要喺馬鞍山搭過去，再唔走就搞唔掂。

我舉手，Miss就行咗埋嚟：「咩事？」

「還掂你都播緊片，我走先？」我問佢。

「可以啊。」

聽到呢句，我即刻將啲嘢掃曬落袋然後衝落樓。

臨走之前，我都不忘企喺門口向Miss嚟一個九十度鞠躬。





Miss你係一個好老師，教育界欠你一個交代。