我無啦啦同隻芝娃娃交換咗身體，跟住無啦啦又遇上喪屍大爆發: （59）

個鐵蓋遮住曬所有光線，我乜嘢都睇唔到，更加唔知自己會被帶去邊度。

過咗一陣，我feel到嗰條友停低腳步，並好有禮貌咁問：「波士，我可以入嚟嗎？」

大概三秒後，傳嚟「噠」嘅一吓開門聲。

嗰條友托住隻碟行入去：「波士，剛才我喺附近海域，居然捉到一隻八爪魚仔，我知波士你鍾意食，所以特登洗乾淨，兼且落好調味料，帶嚟請你老人家慢用。」

佢一邊講一邊將隻碟平放，跟住有把聲回應佢，不過唔係講中文，嘰哩咕嚕咁唔知係咩語言。





開頭聽落以為係日文，聽聽吓有句「乜乜mida」同埋「乜乜寵」，於是我估係講緊韓文。

嗰把聲一輪嘴講咗一堆韓文，隨之擺我上檯嗰條友回答：「多謝波士讚賞，無乜嘢我返出去先，唔阻你同主任開會。」

講完呢句，嗰條友就離開咗。

我俾個蓋冚住，乜都睇唔到，只係聽到漸行漸遠嘅腳步聲同閂門聲。

根據嗰條友剛才講嘅嘢推斷，依家有個叫波士同主任嘅人正喺度開會，而我呢隻八爪魚仔就係座上菜式。





「波士，啱先我地講到聯合國同政府嘅代表，隔咗個禮拜，終於忍唔住再次主動聯絡我地，表示有意收購我地嘅特效藥。」

主任用中文講完，個波士都係用返韓文回應，所以我基本上只聽得明一個人嘅說話。

「你話個價錢再抬高多20%？」

「（韓文）」

「波士果然英明！家陣喪屍嘅數量超過八成，對家一定好心急，一定唔想俾情況再惡化落去。」





「因為假如情況繼續失控嘅話，咁到時唔單止香港有喪屍，甚至會牽連埋其他地方，乃至全世界，所以就算貴多20%甚至30%，佢地都可能會應承。」

「（韓文）（大笑）」

「哈哈哈！我都係跟波士你學嘢啫。」

「（韓文）」

「呢層你放心，我地保密得咁嚴密，一定無人知隻喪屍病毒係我地放出嚟。」

「（韓文）（大笑）」

唔係呀嘛，我有無聽錯，條友話啲喪屍病毒係佢地放出嚟嘅？？？

但係佢地又話有特效藥？咁即係放隻病毒出嚟，然後賣自己啲藥出去咁仆街？





出面咁多人處於水深火熱中，佢地就匿埋喺水底基地un un腳，究竟係咩人咁黑心？

冚住隻碟嘅鐵蓋呢個時候被揭開，我見到一個年約五十歲、兩鬢斑白嘅中年男人坐喺餐檯前。

佢拎起筷子，將我成隻夾起，慢慢放到口邊。

癡撚線！呢條泡菜佬想生啪八爪魚？

睇《原罪犯》我以為嗰啲只係電影情節，到頭來先知原來韓國人現實就係咁癲，望到隻八爪魚仲郁緊，咁佢都敢擺入口。

佢大大口一啖咬落嚟，我當堂feel自己啲汁咇曬出嚟。

與此同時，全身一陣暈浪嘅感覺，眼前嘅畫面天旋地轉。





一路轉，轉到個畫面由韓國佬個口，變成自己個嘴含住隻八爪魚，咁就即係代表，我同個韓國佬交換咗身體。

無數錯嘅話，呢次係我第八次身體交換。