我無啦啦同隻芝娃娃交換咗身體，跟住無啦啦又遇上喪屍大爆發: （38）

俾四隻喪屍加埋八隻手捉住，我完全郁唔到，於是大聲求救：「Irene！阿明！救命啊！」

個「啊」字都未講完，就有人出手救我。

不過就唔係Irene同阿明，而係三個南亞裔人士。

佢地先拉開捉住我嘅喪屍，然後手持住斧頭，兜頭劈落去啲喪屍度。

呢三人都孔武有力，而且完全唔留手，輪流將四隻喪屍個頭批落嚟。





曾經做過喪屍嘅我，見到啲喪屍被斬首，心入面覺得有少少殘忍，甚至令我諗返起自己俾嗰個四眼仔，用電鋸折磨嘅情景。

只但係呢刻我作為人類，喪屍係與我為敵，假如對敵人仁慈，或者就係對自己殘忍。

過咗一陣，三個南亞仔打敗四隻喪屍，救我咗一命。

「多謝，多謝你地救咗我！」 我誠心咁向佢地致謝。

「既然你都知我地三個救咗你，咁靚女你有咩表示先？」





其中一個前面pat陰染咗綠色嘅南亞仔，借啲意攬我條腰。

我即刻嚇到縮一縮，並詐詐諦諦話：「咩表示？我唔係好明白你嘅意思。」

「乜我啲廣東話講得唔夠標準咩，但係唔緊要，你跟我地嚟就明架！哈哈！」條綠毛仔同另外兩個南亞仔拉住我隻手，唔知想帶我去邊。

「你地想帶我去邊？」

「嘻嘻！去到你咪知囉！」綠毛仔露出邪惡嘅笑容。





直覺話我知一定無好嘢。

於是我「哎呀」一聲，扮腳痛行唔到。

佢地停低問我咩事，我見對方一鬆手，就立即擰轉面逃跑。

殊不知三人嘅反應好快，一吓就合力將我捉返住。

然之後，條綠毛仔直接抱起我：「你都未報答我地，咁快就想走？」

「你咁講係咩意思？你地究竟想點！」

我揸住鐵通想一棍扑落去綠毛仔個頭上，但就俾側邊兩個南亞仔出手阻止，並搶走埋碌鐵通。

我搏曬老命掙扎都走唔到，最後俾呢三條友帶咗去就近一間美容鋪。





入到去，佢地仲鎖埋門困住我。

三男一女共處一室，我心諗今次仆街啦！