我無啦啦同隻芝娃娃交換咗身體，跟住無啦啦又遇上喪屍大爆發: （20）

嗯？呢度就係天堂？

點解天堂咁紅嘅？四周圍有咁多紅色黐笠笠嘅嘢，又係啲咩嚟？

同埋點解會有咁大浸嘅血腥味？

我嘗試望清周圍，不過視線有啲模糊，比之前變成狗嗰陣仲要矇一啲。

另外，我本來斷咗手腳，依家又可以自由郁動返。





如果係因為靈魂超越肉體嘅限制，呢樣我可以理解，但實際情況又好似唔係咁。

我嘅四肢變得好短，身體係幾乎完全貼近地面。

除此之外，前面仲多咗兩執觸鬚，後面又多咗條好長嘅尾。

諗諗吓好似真係有啲奇怪，啱先喺臨失去意識之前，我好隱約咁feel到有啲嘢躝咗上身，而且聽到啲「吱吱吱」嘅聲。

仲有合埋眼嗰刻，身體好似打咗吓冷震。





我諗緊乜嘢會發出吱吱聲，而且有條尾又有觸鬚？

Um...唔通係老鼠？

「轟隆！」

忽然響起一陣行雷聲。

抬頭望去，發覺自己好似跌咗落個山窿度，再向上望，睇見天空烏雲密佈。





個「山窿」望落唔深，我向上一跳，結果就輕鬆跳出外面。

之後見到嘅畫面，幾乎嚇到我瀨屎。

有一個好撚大嘅人頭平訓咗喺度，個頭係大到我無辦法睇曬全貌。

我退後少少，再瞄一瞄，個人頭啲眼耳口鼻同輪廓似係女人。

然後我又望返入去個「山窿」，咁樣離遠睇，下面就係一堆爛咗碎咗嘅腸同內臟。

哦！咁我知係發生咩事啦！

喺我失去意識前，有隻老鼠捐入我個身，偷食我肚入面爛咗嘅腸同內臟。

無論係腸定係內臟，佢地都係屬於我身體一部分，當佢一咬落去，咁便觸發到我同佢交換身體。





換句話講，我依家未死，只係變咗老鼠。

至於上咗個師奶身隻老鼠…

我爬上佢塊面，轉咗兩個圈，佢一啲反應都無。

照咁睇嚟，佢已經香咗。

正所謂「All lives matter」，儘管逝去嘅只係老鼠嘅靈魂，但我喺心入面都為佢默哀咗10秒。

反觀返我變成老鼠呢單嘢，都唔知值得開心定唔開心好。

係就係未死得，只不過作為老鼠咁樣生存落去，似乎又唔係一件值得拍手歡呼嘅事。