我無啦啦同隻芝娃娃交換咗身體，跟住無啦啦又遇上喪屍大爆發: （18）

無咗右手，就算得返一隻手我都要還拖。

「Raughhh！」我現出猙獰嘅面目，伸手想去捏四眼仔條頸。

喺隻手就快掂到佢一刻，旁邊嘅「亞狗」忽然出手。

佢一吓爪擊，將我嘅前臂斬開三截

我呆咗一呆，然後望一眼「亞狗」。





佢出咗一招之後就停手，臉上隨即流露出掙扎嘅表情。

對佢嚟講，面前一個係養育佢嘅主人，一個就喺患難中認識嘅朋友，可能佢仲猶豫自己應該幫邊一邊。

「你落唔到手就等我嚟！」四眼仔推開「亞狗」，跟住將電鋸喺我身上抽返出嚟。

我個肚穿咗個大窿，啲乜腸物腸同內臟變得蓉蓉爛爛。

我雙手斷開，好難作出反抗，想逃走但下一秒又俾條友用電鋸，鋸斷埋隻右腳。





我當堂失去平衡，成個人向後訓低，後尾枕「咚」一聲硬撼著地。

大量鮮血不停喺兩隻手同隻腳嘅傷口噴灑出嚟，將地下染成紅色。

得返一隻腳，咁樣嘅情況下，我好難再發力企得返起身。

講真嗰句，做喪屍做到我咁都算失敗，一啖肉都食唔到不得止，仲要落得如此狼狽嘅田地。

個四眼仔本來想鋸斷我個頭了結我，不過「亞狗」佢阻止咗。佢似乎都係唔忍心，見到自己嘅主人死喺自己面前。





與此同時間，周圍捲起一陣大風，並傳嚟「伏伏伏伏伏」嘅聲音。

攤咗喺地下嘅我唔使抬起頭，就見到空中嚟咗一架直升機。

架機嘅機身印有聯合國嘅logo，有一個全身著住裝備、戴住防毒面罩嘅軍人，拉開直升機門，向下拋咗一堂梯落嚟。

個軍人用手勢示意四眼仔同「亞狗」擒上條梯。

估唔到連聯合國都出動埋，好可惜，佢地唔會帶埋我走，因為我係喪屍。

一隻垂死嘅喪屍。