我無啦啦同隻芝娃娃交換咗身體，跟住無啦啦又遇上喪屍大爆發: （10）

Raughhh！！！

我終於明白點解喪屍會發出咁嘅叫聲。

原理就同普通人肚餓嗰陣，個肚會咕咕聲一樣，分別只在於聲音唔同。

人肚餓會想食嘢，喪屍肚餓就會想食人。

而喺呢個時候，剛才嗰個喺車底踢走我嘅阿叔，俾五、六隻喪屍從車底拖咗出嚟。





「你地一個二個唔好逼我郁手，話曬阿叔我係睇『龍虎門』大架！」

阿叔聲大大，實質就無貨賣。

幾隻喪屍一擁而上，條友全無招架之力，眨吓眼就被咬到手斷腳斷。

人肉同鮮血嘅香甜味，瞬間充斥喺空氣之中。

我俾呢股味道徹底吸引，身體不由自主咁圍埋過去，好想食埋一份。





唔得唔得！雖然我變成喪屍，但唔代表就要食人！

伴隨住內心嘅吶喊，我慢慢停低咗腳步。

偏偏咁啱同咁「橋」，嗰個阿叔嘅手掌被咬甩，兼且飛脫咗出嚟，落正喺我手上。

濃郁嘅香味同甜味鑽入鼻孔，挑起咗強烈嘅食慾。

理性話我知，面前嘅係人肉，我唔應該放入口，弊就弊在身體卻唔聽話，揸住隻斷掌，越擺就越近口邊。





「點解…我嘅…身體…唔同咗...」

呢個時候，同我交換咗身體嘅師奶，終於發現自己變咗做芝娃娃。

隻狗被咬之後，同樣都變成喪屍，背脊上傷口流嘅血，明顯失去咗原本嘅味道。