我無啦啦同隻芝娃娃交換咗身體，跟住無啦啦又遇上喪屍大爆發: （1）

星期日，下晝三點半。

我帶住珍藏嘅幪面超人古迦真骨雕figure，嚟到柴灣公園，準備同人交收。

個買家同我都係住喺附近，所以揀咗公園呢度作為交收地點。

呢排如果唔係手頭緊等錢使，我諗我都唔會咁捨得，賣走自己心愛嘅玩具。

今年廿五歲嘅我自己一個人住，半年前老豆老母移咗民，去咗加拿大過退休生活，剩低我同一間四十年樓齡嘅舊居屋。





雖然平時唔使交租，但我本身人工唔算高，家陣啲水電煤等雜費，全部我一條友啃曬，基本上每個月荷包都係掹掹緊。

再加上上個禮拜去咗轉泰國，使錢使突咗，搞到今個月無錢找卡數，淪落到要變賣玩具嚟周轉。

我坐喺公園池塘邊嘅涼亭，等咗十五分鐘都未見個買家出現。

whatsapp條友佢又唔覆，都唔知係咪想放我飛機？

「汪汪！汪！」





呢個時候，有個師奶拖住隻芝娃娃坐落嚟對面。

芝娃娃體型細粒，但卻聲大夾惡，鍾意亂叫亂吠，出咗名乞人憎。

「汪汪！汪汪汪！」隻狗碌大對眼，對住我猛咁吠，嘈冤巴閉。

「唔好意思，小姐你隻狗好似有少少嘈，唔知你介唔介意叫佢靜一靜？」我好有禮貌咁同個師奶講。

點知對方大大聲串返我轉頭：「Sorry喎，我BB逢親見到啲唔順眼嘅人，佢就會忍唔住吠，連我都stop佢唔到。」





「不如你自己行開，等佢見唔到你個衰樣，到時可能就會收聲。」

頂佢個肺！呢條八婆咁撚搶口，居然兜口兜面串鳩我！

我嬲到仆街，當堂想屌鳩返佢，不過咁啱電話響。係嗰個買家打嚟。

我㩒住內心嗰團怒火，行出涼亭出面聽咗個電話先：「喂？你好？」

「噹…啪喇…噠噠…」

電話通咗但聽唔到對方出聲，淨係得啲莫名其妙嘅雜音。

我再「喂」多兩聲都係無人應，跟住突然傳出「啊」一聲慘叫，嚇到我即刻收線。

頂！條友人影又唔見，打電話過嚟又唔出聲，擺明係運吉！





等多五分鐘如果再唔見人，咁我就直接取消交易！

我擰轉身，諗住返入涼亭坐住等，殊不知一擰轉面，見到綁喺芝娃娃頸上條狗繩鬆咗。

下一秒，隻衰狗狗衝埋嚟咬我。

由於事發突然，而且隻狗同我相距好近，我想避開但避唔切，結果左腳腳眼被咬咗一啖。

被咬嗰一刻，我感受到一吓痛楚。

同時間，眼前天旋地轉，然後全身打咗個打冷震，再跟住奇怪嘅事就發生！