我嘅職業係專溝人地個女朋友: 11.19

兩日後，李立仁突然黎左搵我，我估佢應該係為善柔嘅事而黎。但同我預想唔同，佢見到我第一件做嘅事並唔係鬧我一輪而係直接一拳打左落我塊面度。
 
照計李立仁應該一早就知我出軌嘅事，無理由仲咁激動。不過雖然有d錯愕，但因為自覺有愧，所以起初我都並無還手。
 
但隨住佢一拳又一拳好似發左顛咁係咁打，我驚我再唔還手真係會比佢活生生咁打死，所以捱左幾拳後我終於忍唔住出手推開左佢...
 
「打夠未呀? 痴線架? 再打就死架喇!」我對佢咆哮道。
 
「未呀人渣! 就算打死你我都唔會覺得打得夠呀!」講完佢又想再衝埋黎打過。
 




「喂，好喇下! 已經比你打左幾拳無還手，再打我真係唔客氣架喇!」我再企圖制止佢。
 
「好呀，你還手呀，最好你打死埋我! 你衣個人渣，殺人凶手...」李立仁仲想打，但我見佢唔知幾時開始原來已經係度流緊馬尿，加上頭先講嘅果句說話，終於令我察覺到有d唔妥。
 
「你講咩呀? 咩殺人凶手呀...」我大聲咁問。
 
「話你呀殺人凶手!係你害死善柔架! 」李立仁邊喊邊對我大罵。
 
「你... 你講咩呀? 咩害死善柔呀? 」我追問。
 




「善柔自殺死左呀! 你開心啦，人渣! 」
 
「你... 你講多次? 善柔自殺死左? 講笑唔好搵衣d野黎玩喎! 」
 
我期待著李立仁答我頭先講嘅野只係講笑，但見佢都開始失控坐左係地上面嚎哭，我就知道我衣個期待註定會落空...
 
「善柔真係自殺死左?」我再問。
 
佢無再答我。
 




 
剎那間，我個腦完全運作唔到...
 
善柔死左?
 
因為我嘅背叛所以佢自殺死左?
 
唔會架... 我接受唔到...
 
雙腳霎時間好似無晒力咁，我不自覺都跪左係度，呆左再出唔到半句聲，腦入面就只係識得不斷咁重覆衣兩個問題...
 
 
 
「我好後悔...」過左唔知幾耐，李立仁哭聲漸止然後突然講。
 




「...後悔d咩?」見佢無再出聲我就好自然咁問。
 
「後悔唔早d表白比佢知自己嘅心意結果比你搶走左佢然後再傷害佢...」
 
「...我都好後悔自己傷害左佢...」後悔? 我何嘗唔係...
 
「同埋... 我好後悔當日帶佢去捉你姦...」
 
李立仁嘅說話立刻點燃左我內心嘅炸彈，衣一刻我先知原來善柔唔係自己撞到我同Kelly，而係李立仁報串。
 
「... 係你話佢聽? 仲要比佢親眼見住?」我即刻質問佢。
 

如果佢無咁多事，我同善柔衣家仲會一齊好好的。
 




如果佢無帶住善柔去親眼見証我出軌果一幕，善柔可能唔會受到咁大打擊咁就唔會自殺。
 

人都係有逃避責任嘅傾向，特別係當d責任大到自己根本唔足以負責果陣。
 
所以當我一搵到責任轉移嘅對象，我好自然就想將自己嘅愧疚，懊悔同責任全部轉移晒去李立仁度。
 
害死善柔嘅係佢!