我嘅職業係專溝人地個女朋友: 11.17

初初每次見完Kelly其實我都會好驚同好內疚，覺得自己對唔住善柔嘅同時亦好驚有日善柔會發現然後同自己分手。所以每次事後我都同自己講唔可以再有下次，然後再加倍咁對善柔好作為補償去令自己內心好過d。
 
可惜每次過左段時間後我都係會將衣種感覺拋諸腦後然後再一次抵受唔住誘惑接受Kelly嘅邀請甚至係自己主動去搵佢。
 
然後隨住個心漸漸適應左衣種罪疚感，我慢慢竟然開始變得心安理得。
 
 
只要善柔唔知道，佢就唔會受到傷害，然後我又因為於心有愧而對佢更好，咁貌似其實都無咩問題?
 
 




而同時間面對住Kelly嘅熱情，我又開始諗，到底Kelly其實係咩心態呢?
 
明明咁多人追，點解佢偏偏對我就情有獨鐘好似非要我不可咁? 仲要完全唔介意同我發展成衣家衣種關係?
 
雖然我無問佢亦無主動講，但同佢接觸多左，我大概都估到當中嘅一二。
 
 
正如之前所講，受慣一眾兵員前呼後擁嘅佢初初其實應該只係接受唔到我對佢展露出嘅完全零興趣，傷害左佢嘅自尊心。而喺見過善柔嘅相片後，就更加激發出佢嘅好勝心。
 
為左想証明自己比善柔更有吸引力，佢對我發出左凌厲嘅攻勢。而喺佢不斷嘅努力下，我亦不負佢所望終於比佢得償所願對佢產生左興趣。




 
對於之後可以令我出軌，佢初初其實都好滿意，因為曾經對佢咁冷淡嘅我最後都係成為左佢嘅裙下之臣，咁無疑証明左佢嘅魅力係無人能擋。
 
不過雖然我係出左軌同佢上左床，但之後嘅發展卻同佢預想中有所不同，所以慢慢地佢又開始變得不滿現狀。
 
因為當過左段時間後，佢發覺我同善柔之間嘅感情並無佢預期中嘅變化，我地仍然係恩愛如昔，我對善柔嘅心並無因為佢嘅出現而改變過，這讓佢感到很不是味兒，因為咁代表佢仍然係贏唔到善柔。
 
始終佢最想証明嘅係佢比善柔更吸引，所以佢最想得到嘅其實係我個心而唔係我個身，佢好希望可以喺善柔手上搶走我，咁先代表到佢嘅魅力係完勝善柔。
 
只但係迷戀愛慕左善柔咁多年，我對善柔嘅感情又邊有可能咁易被佢超越同破壞?




 
Kelly雖然係有佢獨特嘅吸引力，但咁唔代表足以分薄我對善柔嘅感情甚至令我變心。
 
每次當見到我同善柔仲好恩愛，又或者因為約左善柔而拒絕佢果陣，佢都會妒火中燒，然後更加落力咁討好我。
 
結果不知不覺間，唔服輸嘅佢對我都變得越黎越投入同認真，令我愛上佢好似成為左佢人生其中一個目標咁，或者衣樣都係佢一開始始料所不及。
 

越係得不到就越係會令你想得到
 

衣句確實係恆久不變嘅道理。
 
 
可能你會問，其實佢要破壞我同善柔感情好易啫，等人知道我出左軌咪得囉? 咁我同善柔自然會散。




 
但自尊心極強嘅佢又不屑用衣d旁門左道嘅方法，佢覺得要堂堂正正咁用佢自己嘅魅力去俘虜我個心，先代表佢係好過善柔。
 
坦白講，衣點其實都係我幾欣賞佢嘅地方，亦好彩佢有衣份執著，我先可以好放心咁繼續同佢一齊落去。
 
唔蠢嘅我慢慢了解到佢衣種微妙嘅心態後，我並無道破反而更加樂在其中。
 
見到受唔少男生追捧仰慕嘅女神沉左自己船仲出盡力咁去討好自己，我唔可以否認當時嘅我感覺真係好爽，亦再一次令自己嘅自信心得到飆升。
 
 
不過自信自滿嘅時間其實係最危險，因為習慣同自信會令你鬆懈。
 
加上我喺玩衣方面嘅經驗亦確實不足，結果上得山多終遇虎，最後我終於玩出禍比善柔發現左我出軌...