我嘅職業係專溝人地個女朋友: 9.5

我有個朋友叫鄺善柔
 
自出世果日開始，佢就註定同一個叫李立仁嘅男仔結下一種莫明嘅緣份。
因為佢地不單只係同年同月同日同地方生，而且兩家人又係好朋友仲住得好近，加上因父母工作關係好多時李立仁放學後都會上鄺善柔屋企等佢阿媽放工先黎接佢走。
 
所以佢地兩個都可以話係一齊長大，成日見面好似兩兄妹咁親。
 
鄺善柔仲有個阿妹叫鄺善潼，一個肥嘟嘟好可愛又成日笑嘅妹妹。而自從有左阿妹之後，因為覺得佢好似自己，所以鄺善柔發覺自己身上肩付多左個責任，就係要樹立一個好榜樣比善潼跟住學等佢唔會學壞同行差踏錯。為此佢好努力咁鞭策自己，希望盡量做好自己等阿妹可以有一個好嘅學習對象陪住佢長大。
 
潛潛地，佢對自己要求越黎越高，亦培養出一種對自己樣樣野都要追求完美嘅性格同執著。雖然大大下，佢就發覺阿妹同自己好似越黎越唔似，甚至有種南轅北轍嘅味道，但因為已經習慣左，所以佢並無因此降低對自己嘅要求。




 
同時間，鄺善柔好慶幸自己可以喺一個健康快樂嘅家庭長大。因為佢父母兩個嘅關係一直都十分要好，兩個人之間果種恩愛程度甚至可以用夫婦界嘅role model黎形容都不為過。
 
鄺生鄺太係大家嘅初戀，一齊後就一直恩愛到衣家。自懂事以黎，鄺善柔就從未見過父母鬧交或者有任何不快嘅事件喺佢地兩個之間發生。就算有時大家意見唔同，佢地都會好心平氣和咁坐低傾偈解決永不動怒，所以佢地好似永遠都維持緊喺滿分嘅恩愛狀態，亦因而令鄺善柔對自己長大後要搵嘅另一半有左一幅完美籃圖，愛情就應該係要好似佢嘅父母咁先岩。
 
而作為父母，鄺生鄺太亦都不時會分享一d自己擇偶條件，相處心得同經驗比佢。所以鄺善柔對另一半都有自己一份完整嘅specification，好清楚自己將來要搵一個點樣嘅人，應該要點去經營一段關係。
 
佢好希望自己將來嘅愛情都可以好似佢父母一樣咁完美，而佢亦認為只要跟足spec去揀岩人，花心機跟足父母所教嘅相處之道好好去經營段關係，佢將來嘅愛情都自然會好似父母咁成功同完美。
 
隨住年紀漸長，鄺善柔不免都會到左開始對異性產生興趣嘅年紀。作為一直係自己身邊嘅異性，鄺善柔間中都會諗自己對李立仁嘅感情係屬於邊種。




 
親情? 友情? 定係愛情? 
 
起初其實鄺善柔並無對李立仁有d咩特別嘅感覺而只係當佢係一個好親嘅buddy，但當李立仁都開始踏入青春期，不論身高同外表都產生左急劇嘅變化，加上有時佢一d對自己貼心嘅舉動，無可否認，間中都會觸動到鄺善柔對衣位青梅竹馬產生一d異樣嘅感覺。
 
外表唔差，了解自己識欣賞自己，對自己好，會氹自己捨命保護自己，加上由細到大兩個一齊成長夠晒共同興趣同話題，其實李立仁應該係幾符合自己要求嘅一個對象。甚至佢會諗如果兩個人最後真係可以一齊，佢地嘅故事應該比佢父母更加完美同特別，因為佢地係一出世就已經結下不解緣嘅青梅竹馬。
 
不過無諗過因為一件可能係微不足道嘅事，卻令鄺善柔嘅觀感突然產生左改變。