我嘅職業係專溝人地個女朋友: 8.31

潼:「Hi」
 
我:「近排幾好嗎?」
 
潼:「唔太好唔太差，你呢?」
 
我:「比較混亂，不過幫兩個friend各自追左兩個女朋友。」
 
潼:「咁犀利? 你果然係情聖黎架喎~」
 




我:「可惜能醫不自醫呢…」
 
潼:「所以…你係未有答案，而唔係唔敢講個答案我聽?」
 
我:「嗯…」
 
潼:「可唔可以坦誠話我聽你嘅真實感受同諗緊咩?」
 
我:「其實喺追你果幾個月，我覺得自己唔係對你無感覺，但因為你太似你家姐，每次同你一齊我都不其然會諗起佢，所以我其實都分唔清自己係真係對你有感覺，定係對似佢嘅你有感覺…」
 




潼:「你驚如果係後者，有日會傷害到我?」
 
我:「係呀，我驚唔work果陣會傷害到你，傷害左大家嘅關係，而且自己個心好似始終有另一個人咁...」
 
潼:「even唔值得一次嘗試嘅機會?」
 
我:「有d野唔可以亂咁試架，試左未必可以返到轉頭。唔通你接受到最後自己原來只係一個替代品?」
 
潼:「我唔知… 但我知我好想要有一次機會，如果最後真係唔work我都心甘命抵…」
 




我:「但我真係做唔出傷害你嘅行為…」
 
潼:「所以衣家最糾結你嘅係你唔知對我定係對我家姐有感覺? 如果攪得清楚你就會知自己想點?」
 
我:「應該係…」
 
潼:「咁我幫你一把呀」
 
我:「點幫?」
 
潼:「好快你就會知…」
 
我:「有咩方法?」
 





善潼無再應我，令我忐忑不安不停咁望住個電話望左成個晏晝。到到夜晚，我突然收到佢嘅message。
 
「其實你今日唔搵我我都會搵你，因為我地一家已經決定左移民，今晚就會飛去澳洲…
 
 本身一直我都十五十六唔想走，因為走左就代表以後都見唔到你。不過衣半年等極都等唔到你嘅答覆，我都明白有d野係無得勉強，或者我都應該要逼自己move on去過新嘅生活。至少，之前果幾個月我都算賺左同你一齊果段開心嘅日子呀，唔算係一無所有亦唔應該再咁貪心…
 
唔知係咪天意呢，臨走果日竟然見到你終於搵我，可惜答案都唔係我期待想聽到嘅答案。不過至少我知你心入面唔係無我，只係你自己都唔肯定心入面著緊果個係我定係家家啫… 
 
有人話，死人係天下無敵，所以我永遠都無可能嬴佢取代佢係你心目中嘅地方。不過為左幫你認清你心入面嘅所思所想，我決定為你留低左一個方法…
 
記唔記得我同你講過家姐留低左本日記? 睇完本日記，你就會明白家姐嘅心路歷程，點解佢會覺得你無安全感而選擇左另一個，點解最後佢會結束自己嘅生命…
 
 衣家我將佢本日記放左係我地層樓個垃圾房側邊，如果你衣家趕去，就可以喺清潔姐姐倒垃圾前拎返佢，然後可以知道你一直都想知道嘅答案。
 
不過我地仲有一個鐘就會入閘，而當我一上機你可能有排都唔會再見到我… 所以如果你仲想見我一面，你衣家趕黎機場應該都仲可以趕得切。




 
雖然我唔鍾意咁比，但係我估衣個方法應該可以令你認清自己心入面，到底係我定家家重要d…
 
跟隨自己個心走啦，就算最後你揀左家姐，我都唔會怪你怨你，仍然係你半個阿妹唔會改變。
 
保重喇立仁哥哥。」
 

睇完個message，我內心好惶恐不安，努力消化緊善潼一家突然移民衣個消息。雖然我知係善潼專登唔想比我知住驚因為咁而影響到我，但如果我衣半年稍為有關心下佢地同佢地傾下偈見下面，或多或少點都會有跡可尋。
 
衣段時間香港發生左太多事，好多人想移民離開都係正常嘅…

 不過衣家嘅時間已經唔容許我再諗衣d無謂野，我衣家要決定嘅係衝返屋企解開善柔一直嘅秘密，定抑或選擇衝去見善潼最後一面再盡力留住佢?
 
我以為我會為衣個難題苦惱猶豫不決好耐，但原來當真係要逼住你去做決擇嘅時候，心入面真係會豁然開朗得到答案。




 
我諗都唔駛諗就拎起屋企鎖匙然後就衝左出門口。