我嘅職業係專溝人地個女朋友: 8.29

喺社會事件初期，郭非凡一向係偏向政治冷感果堆，而軒爺就偏屬於係和理非嘅黃絲。
 
其實好多所謂嘅中立，本身係源於佢地對衣件事嘅漠不關心。當你真係嘗試了解過到底發生緊咩事，理解所有前因後果，其實就好難會做到所謂嘅”中立”。
 
郭非凡亦一樣，之前嘅佢淨係掛住返工同溝女，對社會嘅事情都唔太關心，為此軒爺對非凡曾經都頗為不滿，覺得佢係港豬。
 
不過慶幸佢只係唔關心而唔係去到藍嘅階段，唔係我地衣個三劍俠嘅組合可能都要面臨拆夥嘅危機。
 
有sales朋友同我講過，衣個世界有兩個話題係唔可以同客人討論，一係宗教二係政治。因為衣兩個話題一旦被觸碰，只要大家話不投機，最後就好可能會演變成為駡戰，嚴重破壞大家嘅關係。
 




其實自2019年後，大家身邊有幾多親戚朋友從此鬧翻，甚至變成老死不相往來? 無論幾多年感情，因為社會撕裂，政局改變，好多野都變得唔一樣，再無可能可以返返去以前咁…
 
事件初期為左令郭非凡唔做港豬，我同軒爺商量完後最後用左一晚嘅酒水成功氹到郭非凡同我地參與左一場遊行。我地好希望透過咁令佢可以親身經歷同了解一下成件事。
 
始終作為一個香港人，發生咁大件事我覺得真係唔可以咩都唔知唔理咁就算。
 
遊行途中發生咩事我就唔詳細講，不過非凡親眼見識過一d情況同畫面後，佢就開始唔同左，會真係留意多左新聞同網上唔同嘅片段。
 
之後唔駛再用酒水錢，佢都有同我地參與左第二第三次嘅遊行，漸漸同軒爺都越黎越同聲同氣。無耐唔駛我地再講佢自己都會主動share d 新聞，見到好多畫面都會同我地一齊鬧埋一份。
 




事實上衣次事件唔只改變左非凡，仲令好多人都改變左諗法，你睇區議會選舉結果就知道啦。
 
不斷見証完一幕又一幕畫面，郭非凡亦變得更堅定希望追到Eva，唔希望佢再同佢男朋友一齊。而不自覺間佢同Eva亦多左好多溝通，甚至往後時間都一齊參與過幾場遊行。
 
見証住Eva戴住黑口罩甚至參與醫護罷工，非凡話覺得自己除左越黎越鍾意Eva外，心入面亦對對方多左種欣賞同佩服。
 
兩個人一齊，其實有近似嘅價值觀真係好重要。唔係嘅話，去到某d位其實真係好難相處落去。
 
同一時間，社會事件對老師嘅影響其實都好大，因為太多學生參與其中，所以老師壓力好大。而因為咁Nicole都多左好多心煩嘅事加劇左佢同男朋友之間本身已經緊張嘅關係…





 
就係咁，再過多幾個月，Nicole同Eva都各自同男朋友分左手，而我衣兩位兄弟自然亦好快憑住各人自己嘅魅力同溝女技巧贏得左美人歸。

 
不過好多野，原來真係就算你plan得幾好，都唔一定會跟你預期嘅方向行走。