我嘅職業係專溝人地個女朋友: 8.27

「但我又唔覺Nicole會係咁嘅人…」今次到軒爺搖頭。
 
「咁每個人其實都唔同，亦唔會個個女人都真係一式一樣。頭先我都只係講一d例子等你易明d啫~事實上都有d女仔唔係咁，反而會比inspire到自己嘅男仔吸引，咁你個approach就要完全唔同，所以我先話要認識下Nicole先比到advice你。
 
就我觀察，Nicole係比較吻感偏向第一類，雖然佢未必會因為頭先講嘅果堆野而嬲，但就絕對會因為咁而唔開心。」
 
「受教了…」軒爺開始被說服。
 
「當然，我地男人都有我地嘅唔同。例如有d時候我地會想自己一個匿係樹洞解決問題或者等自己情緒過左就會出返黎。但如果女仔唔明，可能就會困惑點解你好似突然唔想理佢，對佢冷淡左咁。跟住開始無安全感亂諗野，所以有時我地都要好好理解佢地嘅思維先管理到佢地嘅情緒，唔係最後都係自己受罪…
 




你得閒可以買本舊書睇下，叫Men Are from Mars, Women Are from Venus。雖然好多佢講嘅野我覺得都唔係話好岩，但睇完至少你會明白男同女係思想上係可以好唔同完全係兩個思維黎。
 
如果我無估錯，佢男朋友應該就係犯上你頭先所犯嘅所有錯誤。例如可能Nicole係學校比家長投訴，或者d學生好唔聽話激親佢，但佢男朋友可能慣左工作上係要拆彈所以聽完佢講次次都只係同佢冷靜分析件事而唔係關心個人，甚至最後就係叫佢辭職唔做，但就忽略左或者根本唔知Nicole好鍾意教書，咁咪令Nicole覺得對方唔了解佢唔知佢嘅需要囉…
 
佢衣d工程師，好多想諗野個mindset都係problem solving，但就理解錯左個問題其實並唔係真係個問題本身。」郭非凡一口氣講。
 
「明白… 咁我應該點做?」
 
「同佢保持傾偈，只要佢肯同你講佢嘅心事，你就有機會。記住，唔好批判對錯，唔係要解決方法，比佢知你用心聆聽，理解佢感受同情佢支持佢，著重個人多過件事，慢慢佢就會同你越講越多，然後你就可以一步一步咁入侵佢個心靈架喇…」郭非凡認真咁將似乎自己已經一早諗好嘅劇本講出黎。
 




「咁我即管試下啦…」軒爺似懂非懂咁。
 
「李立仁，我幫左軒爺咁多，咁你幾時幫返我呀?」見軒爺深思緊自己岩岩教佢嘅野，郭非凡即刻擰個頭黎問我。
 
「我都唔敢講呀，價值觀衣d野，有時都要d外在因素激發先會出現，急唔黎架…」而我都比唔到答案佢。
 
「咁會唔會永遠唔出現架?」郭非凡焦急咁問。
 
「可能架，真係無人會知…」我比定個心理準備佢。
 




不過或者真係天意，無耐後一件事嘅發生果然將衣個潛在炸彈引爆。2019年，反修例事件引發多宗遊行同大型示威衝突發生。