我嘅職業係專溝人地個女朋友: 8.17

「點解你咁好心機調查得咁深入嘅…」聽完善潼講嘅野，我陷入深深嘅打擊之中，開始真係質疑自己做嘅野係咪真係錯。
 
「雖然直覺覺得你嘅方法係有問題，但我都想知事實到底係點，所以特別調查佢地之後嘅故事。」善潼解釋。
 
「但咁都總好過佢地尋死呀，死左就咩都無，而佢身邊嘅人亦都會好傷心… 而且我所知都唔係個個case係咁，好似Maggie同Queenie咁，我唔覺我係害左佢地…」我努力想說服善潼，但更多其實係想說服自己。
 
「你講得無錯，並唔係個個case都因為你而變差。但你有無留意Maggie同Queenie個case，佢地最後都係知道左你個故事同埋你最後並無選擇左無聲消失?咁已經同一般你做嘅case好唔同啦…
 
不過衣個都唔係我想講嘅重點，事實上好似Connie咁，佢都真係因為你嘅介入，同Jacky分手後一段時間就搵到一個同自己夾得黎又真係鍾意嘅男仔，前排仲訂埋婚添。
 




所以我想表達嘅意思唔係話你做緊嘅野一定帶悲劇比對方，而係每個人其實都有佢自己條路要行，有d挫折我地必需要經歷過先會成長。如果一味想逃避衣d衝擊同難關，咁對我地黎講未必係好事。
 
你嘅介入可以係幫助佢地，但同時亦可以係害左佢地…所以如其係咁，點解唔比佢順其自然咁發生留返比佢地自己同個天去決定?
 
我明家姐嘅死令你受到好大打擊，好擔心案發重演好多人會因為失戀而尋死… 不過家家當日嘅決定，其實並唔係單純因為條賤男有左第二個，真係要講其實可能我地唔少人都有部份責任， 所以我先話家家件事係一件單一意外…」
 
「點解你咁講?」我驚訝咁問。
 
「幫家姐執拾遺物果陣，我發現左家姐本日記，亦因而終於稍為了解到家姐一直以黎真正嘅諗法同價值觀… 」善潼帶點哀傷咁講。
 




「咁即係…? 」我想善潼講解多d。
 
「家家嘅諗法我邊可能三言兩語講得清楚，不過要簡單歸納嘅話，我只可以話越完美嘅人，就越難接受到自己嘅唔完美…」善潼神色一黯。