我嘅職業係專溝人地個女朋友: 8.15

「你記唔記得邊個Winnie?」善潼問。
 
「記得， 同佢相處果陣我成日都會諗起細個果陣嘅你呢~」
 
細個嘅善潼雖然無Winnie咁誇張但都絕對係一個肥妹仔。
 
「果d黑歷史就唔駛再記住喇…」善潼面有少少難色苦笑住咁講。
 
「唔會忘記到啦，不論係以前嘅你定衣家嘅你，我都入晒腦架喇…」而我就好溫柔咁講。
 




善潼聽完有d開心又好似有d唔開心，然後就決定唔再糾纏係衣個問題開始講:
 
「Winnie喺你突然消失後唔開心左一段唔短嘅時間，然後佢都終於放低你再聽你話一直希望遇到一個好似你咁識欣賞自己嘅男仔，但就一直都遇唔到… 
 
其實都唔係完全遇唔到，曾經都有一個男仔對Winnie有興趣，只係當佢一拍埋去你度就立刻相形見拙，又無你咁欣賞自己，外型又無你咁好... 
 
所以初初佢想等到個拍得住你嘅先接受，點知等極都再無人出現結果就反而阻礙左自己，到到後悔想接搵返佢人地已經同左另一個一齊…
 
然後越黎越唔開心嘅佢有日竟然喺街撞到Jason，而當時嘅Jason正拖住另一個女仔，一個又瘦又靚嘅女仔。
 




Winnie突然間覺得好自卑，原來無左自己，Jason就可以搵到個咁靚嘅女朋友，同一時間佢又自怨自憐點解自己遇極都遇唔到另一個，而之前明明有個好岩好好嘅又偏偏已經有女朋友… 
 
一個奇怪嘅念頭油然而生，佢覺得係因為自己變心飛左Jason唔岩所以上天要懲罰自己。
 
而見到Jason同佢新女朋友好似好好咁後，佢又開始會諗返起自己同Jason初初一齊果陣嘅時光，曾經佢地都係咁好咁幸福… 然後越諗越後悔，越諗越憎自己。到到諗起你睇返你地以前d message佢又好憎個天。
 
結果有晚佢襯住自己飲醉果陣打左比Jason…」
 
「之前Jason明明對佢咁差，點知過左排佢又乜都唔記得晒咁…」聽到衣度我忍唔住講。
 




「人就係咁架喇，一來佢一直覺得自己變心有愧於Jason，二來人後悔果陣，就一定淨係記得以前好嘅野，美化過去等自己更加後悔… 三來佢回復單身後一段時間，以前果種寂寞嘅感覺又全部返返晒黎。我諗佢最後寧願有個對自己麻麻嘅Jason，都好過乜都無自己一個…」善潼嘗試解釋。
 
「咁之後呢?」我追問。
 
「Winnie以為Jason唔知，所以坦誠講返比佢聽當日遇到你後同你發生嘅事，哭訴自己好後悔當日變心同埋同Jason分手嘅決定，但另一方面亦好替Jason開心之後搵到個靚自己咁多倍嘅女朋友，似乎自己都算做左件好事。 
 
所以希望個天唔好再懲罰佢，比佢搵到一個好似你咁識欣賞佢而又無女朋友嘅男仔。」
 
「雖然聽落係有d怪怪地，但咁似乎對佢地黎講都無咩問題呀。」暫時聽到衣度我覺得問題好似都唔算太大。