我嘅職業係專溝人地個女朋友: 8.5

家姐實在太完美喇，要我超越佢並唔現實亦無可能。所以我諗如果我要擺脫衣個陰影同枷鎖，我就必需要做另一個人，於是我決定開始改變我嘅性格同喜好。
 
家姐喜歡嘅野我唔會喜歡，
家姐鍾意食嘅野我唔會鍾意食，
家姐有嘅興趣同嗜好唔會係我嘅興趣同嗜好，
如果家姐係溫文爾雅，咁我就係活潑好動，
如果家姐係琴棋書畫樣樣精通，咁我就去挑戰籃足排水樣樣玩下。
 
總知，我唔想再比機會其他人見到我就會諗起我家姐話我似佢。
 




我從未同人講過自己嘅真實諗法，但衣d改變無疑係好成功。
 
當我係水運會陸運會拎到獎果陣，無人會再話我係鄺善柔阿妹，因為佢甚少參加體育活動。
 
而當家姐喺校際音樂節拎獎果陣，亦無人會再叫我要學家姐咁叻，因為我從來唔玩音樂。
 
慢慢地，父母買衫買外賣買禮物果陣，唔會再係一式兩份一樣而會主動諗下我鍾意d咩。而我地房入面個書櫃有日亦終於一分為二，左邊係佢嘅文學散文小說集，右邊就係我一套又一套嘅漫畫同公仔書。
 
不過唔好誤會，雖然我有咁嘅轉變，但唔代表我同家姐嘅感情轉差。
 




家姐係完美的，所以佢都係一個好好嘅家姐，對我好好，好錫我好照顧我，同時間我心入面亦都好仰慕我家姐。
 
我咁嘅轉變，唔係對佢有任何不滿或憎恨，而只係單純想對自己身份嘅一種控訴同承認家姐嘅出類拔萃。
 
無論我變成點，家姐仍然教曉左我好多野，我唔開心時佢都會成日開解我。
 
有時表面上我可能都硬頸好似未必聽從佢嘅教誨，但心底入面其實佢每一個教導我都有暗地裏銘記於心。
 
不知不覺已經無人記得我以前到底係點，包括我自己。