我嘅職業係專溝人地個女朋友: 6.15

對於善柔冷漠嘅責備，我感受到自己內心嘅失望，而衣種失望令我發現，或者我並唔係為左出返啖氣而即刻走去同善柔講，而係我心入面暗地裏其實有種期待，期待著佢地會因為咁而分手，期待著佢地分手後我同善柔就可以返返去以前咁。
 
但善柔嘅反應話左比我聽比起信我，佢更信黎浩明，佢地嘅感情比我想像中更好。
 
衣種期待嘅落差令我萬分失望。
 
不過今次真係我親眼所見唔係屈佢，為左挽回善柔對我嘅信心，為左証明我先係岩，我並無放棄。相反，我更加努力去搜集証據。
 
之後我開始跟踪黎生，然後有次終於見到佢同另一個女仔一齊果陣，我即刻call善柔黎搵我，再同佢一齊見証住佢地發生緊咩事。
 




當善柔見到黎生拖左另一個女仔，之後上左時鐘酒店，佢嘅面色變得好難睇。
 
佢仲唔死心即刻打比黎生。
 
「浩明，你衣家係邊呀?」善柔期待又害怕咁問。
 
「我? 我…我同班同學傾緊project呀，再打比你呀，bye!」可惜卻只係得到黎生嘅謊言同急不及待嘅收線。
 
「bye…」善柔只可以喺電話對住已經收左線嘅對方講再見。
 




 
「你衣家信我啦?」我並無在意善柔嘅難過同打擊而只係為自己問左衣句。
 
「咁你衣家係咪好開心?」善柔見我好以好開心咁反問返我。
 
「我…唔係呀…」我當然否認。
 
「你比我自己靜下。」然後佢雙目開始無左神彩咁同我講。
 
「你無事嗎?」而我仍終於察覺佢神色唔妥開始有d擔心。




 
「無事…」善柔望住另一邊咁答。
 
「比我陪住你啦…」我想陪住佢。
 
「唔駛… 我之後再搵你啦…」然後佢留低左衣句後就自己開始離開。
 
知佢需要時間冷靜於是我停低左腳步就咁望住佢個背影睇住佢慢慢離開。
 
而衣個或者係我人生最錯嘅一個決定。
 
又或者由決定帶佢黎要佢親眼見証住衣幕果刻開始錯誤就已經鑄成…
 
當時嘅我其實真係好自私淨係諗住自己，又或者果時嘅我仲係停留喺同以前鬧郭非凡失戀變廢人果陣一樣咁天真，低估左失戀同分手對一個人嘅打擊可以有幾大，亦因而忽略左善柔嘅感受…
 




當然，善柔一直以黎比我強大嘅感覺都令我完全錯判左形勢…