我嘅職業係專溝人地個女朋友: 5.3

自從訂婚後，所有野Vienna都有好多諗法，而且好似全部都係要佢話晒事果隻。
 
有唔同意見嘅我當然會反映，但佢就係典型果種意見接受但態度照舊。
 
因為唔同嘅野我地都有嘈過幾次好大嘅交，但因為佢次次企硬而我又唔想再同佢拗落去大家唔開心所以最後都係選擇左道歉同屈服，然後無限咁loop。
 
 
其實因為Vienna家境唔好所以由結婚到買樓同裝修嘅費用，基本上都係我一個人揹晒條數。但結果我就真係變左只係負責比錢找數但就唔會有任何話語權果位。
 
而亦因為咁，一次又一次嘅屈服同妥協令我嘅不滿都越積越多，我覺得自己突然間變得好卑微，好似只可以等人施捨緊愛同尊重比自己咁。




 
不過因為已經決定左結婚，所以我都選擇忍耐。
 
(結左婚後無左衣d問題應該會好好多架喇，以前都無咁多衣d問題啦…)
 
我咁安慰自己。
 
可惜事與願違，有d野真係唔係想忍就忍到。
 
壓死我最後一根嘅稻草，係有日我發現左佢襯我去沖涼果陣偷偷咁check我部電話。




 
我質問佢點解要咁做，而佢嘅答案係
 
「做咩啫，衣家未來老婆無資格check你咩? 定你身有屎好驚?」
 
 
坦白講，我唔係話好介意佢check我電話，但我好介意佢可以咁理直氣壯完全唔覺得自己有問題。
 
到底佢當自己係咩? 又當我係咩?
 




於是積壓已久嘅情感爆發，我決心唔想再忍落去。
 
因為我可以預見咁結婚之後等待自己嘅必然係無盡嘅不幸，再多嘅妥協同屈就只會縱容對方變本加厲。
 
明明以前佢衣種控制欲都唔係咁強…
 
冷靜過後其實我覺得自己都算好彩可以喺結婚前認清對方唔駛等結婚後先發現然後後悔。
 
不過始終大家都訂左婚我唔想太難睇亦唔想Vienna太傷心，所以當我聽到有壞人衣個服務果陣，我就主動聯絡左佢搵佢幫手。
 
 
---回到現實---
 
「你有無同佢認真傾過? 如果佢係突然變成咁，其實會唔會係佢有婚前恐懼症果d呀?」聽完Joe個故仔我問。
 




「唔係啦…其實諗返佢一直控制欲都有少少強。不過以前拍拖可能無咁多大事而都只係d相對上無關痛癢嘅瑣碎野，例如食咩做咩果d。本身我個人對衣d都無咩所謂，所以咪唔太覺囉…
 
我都有嘗試同佢傾過，但一傾佢就一輪嘴咁連環炮轟，真係傾唔到落去…」聽得出Joe嘅語氣夾雜著萬般嘅無奈。
 
「你真係諗清楚? 我出手就可能返唔到轉頭架喇喎…」好唔容易去到結婚衣步，我向佢再三確定。
 
「諗清楚喇，我唔想下半生都咁過… 或者其實調返轉我心入面有部份都係希望你可以令佢變心然後等我可以下定決心自己得到解脫…」好快Joe就比左衣個答案我。
 
「咁比我觀察下你地相處大半日啦。」
 
 
結果，係煙霧下，我見到我最討厭嘅三個字 – 安全感
 
本身要溝過準人妻已經夠難，點知個比較大機會嘅切入點仲要係我最憎嘅安全感…
 




他媽的… 我真係忍唔住要鬧