我嘅職業係專溝人地個女朋友: 4.19

對我黎講，最完美嘅結局就係勸到Maggie改變主意肯比Louis得償所願然後Louis又唔捨得Maggie回心轉意肯同返佢一齊再黎個BBQ式嘅大團圓結局。
 
不過Louis上次都講左就算Maggie肯，佢都係會選擇Cindy而唔會返轉頭。如果最後結果喺兩個人發生左關係後Louis再按原定計劃飛左Maggie，咁Maggie一定又會覺得係因為性衣樣野而破壞左二人關係攪到Louis要分手。
 
如果再有多一次咁嘅經歷，我相信之後要再改變到Maggie諗法嘅機會應該真係微乎其微…
 
咁如果喺佢地發生關係後，我再令Maggie變心呢? 咁佢唔知Louis變心就唔會覺得係性破壞左段關係，可以改變佢固有諗法之餘又唔會太傷心，貌似都係一個幾好嘅解決方法。
 
問題係我雖然有信心可以令Maggie對自己有感覺，但要靠咁令佢肯同Louis分手就好困難… 始終Louis一直對佢都係好好，只係sex衣樣野成為左佢地障礙。如果佢地最後順利結合，衣個切入點可能都會隨之而會消失，所以要單靠sex去將Louis從Maggie心入面趕走似乎並唔現實，除非Louis都要有d配合…
 




如果Maggie發現同Louis係性上面並唔夾，唔知佢會唔會有唔同嘅諗法?
 
 
雖然我應該可以解開到Maggie心結令佢願意同Louis更進一步，不過當我都未諗好再下一步應該點做果陣，變化卻已經出現。所以話其實任你計劃得幾周詳都好，好多時計劃都未必會趕得上變化。
 
 
喺同Maggie纏綿完後三星期嘅一晚
 
「壞人，你唔駛再幫我喇!」無諗過我未打比Louis，Louis卻先打比我。
 




「係咪發生左咩事?」我不明所意咁問。
 
「本身我係因為唔想傷佢心又覺得自己對唔住佢先搵你幫手，但岩岩我知道左原來我一直都只係個傻佬! 一個不折不扣嘅傻!
 
佢口口聲講唔肯比我掂話要留返比佢嘅未來老公，但點知原來所有野都係假架，佢可以比其他所有男人掂，就淨係唔可以比我掂! 我個friend之前真係無講錯，我就係果個傻佬!」Louis好嬲好燥咁對住我咆哮。
 
「你… 係聽人講定係親眼見?」原來已經東窗事發左。
 
「我有個死黨睇住佢同另一個男人上時鐘酒店，佢唔會呃我!」Louis解釋。
 




「咁你諗住同佢攤牌?」
 
「係! 我要當面奚落佢，鬨爆佢! 所以先打比你同你講唔駛再幫我溝佢，佢唔值得我care佢嘅感受!」Louis仍然好憤怒。
 
「Louis，我唔係想阻止你，亦明白你點解好嬲。不過有兩個問題我想你先諗一諗…」而我可以做嘅就只係盡力令佢先冷靜。
 
「你講…」
 
「首先，你可以諗下衣幾年Maggie對你係點。如果佢真係為左玩你唔鍾意你但同你一齊，咁唯一解得通都係想利用你搵你著數啫。但我上次問過你你話唔係。咁如果佢真係鍾意你但咁做，佢會唔會有佢背後嘅原因?
 
第二係如果你已經決定左同佢分手，自己亦已經有左第二個，理論上你應該唔會咁嬲。咁會唔會代表緊，除左因為佢呃你外，你其實心入面都仲好鍾意佢? 佢係你心目中仲係有好重要嘅位置?」我幫佢冷靜咁分析。